Roggebaai
Roggebaai is dié deel van die middestad van Kaapstad tussen die Jan van Riebeeck-standbeeld en die Duncan-dok. Dit sluit in die gebied aan weerskante van die Heerengracht en rondom Strandstraat, Waterkantstraat, Jettystraat, Seestraat, Wharfstraat, Dockstraat met Roggebaaiplein en Tulbaghplein as kern.
Geskiedenis
Die seefront van Kaapstad het die afgelope eeu groot verandering ondergaan. Oorspronklik was die kuslyn by die huidige Waterkantstraat en Strandstraat en die seewater het tot teen die noordelike bastion van die Kasteel gespoel. Onder andere weens hewige storms en veral die storm van 1722 en die bou van hawehoofde en kaaie het Roggebaai begin toeslik en het die kuslyn stadig noordwaarts geskuif. Tot 1920 was Roggebaai gekenmerk deur Maleier-vissermanne, 'n vismark, visserskuite, pondokke, vis wat gedroog word, nette wat lê en droog, kroeë en selfs twee kerke. In 1937 is met die drooglegging van die gebied begin sodat die stad kon uitbrei en die hawe ontwikkel kon word. Op 9 Desember 1937 is 'n kontrak vir die inpoldering met die Hollandse Aannemersmaatschappij gesluit en op 10 Mei 1938 het genl. J.B.M. Hertzog die amptelike begin van die werksaamhede waargeneem. Boupuin van platgeslane geboue in die stad en milljoene ton seesand wat deur die HAM uit Tafelbaai gebagger is, is op die ingepolderde terrein gestort. Net na die Tweede Wêreldoorlog was die werk klaar en is 65 ha by die middestad gevoeg.
Naam
Roggebaai is waarskynlik genoem na die vis bekend as 'n rog, 'n plat vis met 'n lang dun stert.
Bibliografie
- Craig, J.F.: The Tavern of the Seas / Die Herberg van die Seë. Kaapstad: United Tobacco Company, 194?.
- Standard Encyclopaedia of Southern Africa, deel 9. Kaapstad: Nasou, 1973. ISBN 0-625-00325-X