Regent's Park

Regent's Park (amptelik The Regent's Park) is een van die Koninklike Parke in die Britse hoofstad Londen. Die park met 'n oppervlakte van 166 hektaar is in die noordweste van die stad, noord en oos van die St. Marylebone-buurt, geleë en strek oor twee stadsdele, die City of Westminster en die Borough of Camden. Die kampus van 'n bekende tersiêre instelling, Regent's University London, en die Londense Dieretuin (London Zoo) val binne die parkgebied wat dwarsdeur die jaar oop staan vir die publiek.



Regent's Park

Koninklike Park in
Westminster en Camden

Londen
Vlag van Verenigde Koninkryk Verenigde Koninkryk

Opening

1835

Oppervlakte

166 hektaar

Ligging

Regent's Park in die noorde van Westminster (boonste gedeelte van die kaart)

Bestuur

The Royal Parks

Webtuiste
The Royal Parks Geargiveer 10 Desember 2010 op Wayback Machine

Die terrein was oorspronklik in kerkbesit, maar is later deur koning Hendrik VIII gekonfiskeer om sy privaat jaggronde uit te brei.[1] Hierdie gebied net noord van Sentraal-Londen is in die vroeë 19de eeu deur die argitek en stadsbeplanner John Nash as 'n landskapstuin en ontspanningsgebied vir die koninklike familie en ander adellikes ontwikkel. Nash se oorspronklike ontwerp het voorsiening gemaak vir paleisagtige terrashuise wat die tuin sou omring. Die tuin, wat later ook in ander wêrelddele as 'n model vir stadsbeplanning gedien het,[2] staan sedert 1841 as een van die belangrikste openbare groen ruimtes in Sentraal-Londen oop vir die publiek.

Uitleg
Die meer van Regent's Park

Twee ringpaaie is in Regent's Park aangelê - die Outer Circle loop oor 'n afstand van 4,3 kilometer, terwyl die Inner Circle met 'n lengte van een kilometer die bes versorgde deel van die park, Queen Mary's Garden, omsluit. Behalwe vir twee verdere paaie, wat die twee Circles met mekaar verbind, is die park vir padverkeer gesluit. Die elegante wit pleisterwerk-villa's, wat as terrashuise aan die suidelike, oostelike en westelike kant van die park opgerig is, is deur die befaamde argitek John Nash (1752-1835) ontwerp en het deel uitgemaak van 'n groter bouprojek wat ook altesaam 56 vrystaande villa's ingesluit het. Net agt hiervan is uiteindelik verwesenlik.

Die Regent's Canal, wat die Grand Union Canal met die vroeëre dokke van Londen se seehawe verbind, loop deur die noordelike deel van die park. Regent's Park bestaan hoofsaaklik uit oop parkland met 'n verskeidenheid geriewe, waaronder tuine, 'n meer wat 'n heenkome aan reiers en watervoëls asook geriewe vir bootsport bied, sportvelde en speelterreine. Die park se noordelike gedeelte huisves die Londense Dieretuin en die hoofkwartier van Londen se Dierkundige Vereniging (Zoological Society of London).

Regent's Park behels 'n aantal openbare blomtuine, waaronder Queen Mary's Gardens in die binnekring (Inner Circle) waar die park se opelugteater geleë is; die formele Italiaanse Tuine en die aangrensende informele Engelse Tuine in die suidoostelike hoek van die park; en St. John's Lodge se tuine. Winfield House, die privaat woning van die Amerikaanse ambassadeur in die Verenigde Koninkryk, is op 'n privaat erf in die westelike deel van Regent's Park geleë. Londen se Sentraalmoskee, beter bekend as Regent's Park-moskee, is naby die ambassadeurswoning geleë en kan danksy sy koepel van ver af raakgesien word.

Die kampus van Regent's University London is suid van die binnekring geleë. Dit huisves onder andere die European Business School London, Regent's American College London (RACL) en Webster Graduate School. Primrose Hill, 'n heuwel en park wat net noord van Regent's Park geleë is, bied 'n uitsig oor Westminster en die City of London.

Verwysings
  1. Rob Humphreeys: The Rough Guide to London. New York • London • Delhi: Rough Guides 2003, bl. 340
  2. Deyan Sudjic: Design Museum - London in Fifty Design Icons. London: Conran Octopus 2015, bl. 18

Eksterne skakels

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.