Reënkoningin

Die Reënkoningin of Modjadji is die oorerflike koningin van die Balobedu, 'n inheemse stam van Limpopo, Suid-Afrika.[1] Die opvolging van die posisie van die Reënkoningin is matrilineêr, wat beteken dat die koningin se oudste dogter die erfgenaam is, en dat mans glad nie geregtig is om die troon te bestyg nie. Daar is geglo dat die Reënkoningin spesiale kragte het, soos dat sy die wolke en reën kan beheer. Die laaste Reënkoningin is op 12 Junie 2005 oorlede, maar daar word verwag dat 'n opvolger binne enkele jare gekroon sal word.

Die vorige reënkoningin, Makobo Constance Modjadji VI, afgestorwe in 2005.

Geskiedenis

Daar is talle verskillende verhale met betrekking tot die skepping en geskiedenis van die Reënkoninginne van Balobedu. Een verhaal volg dat 'n ou hoofman in die 16de eeuse Monomotapa (suidoostelike Zimbabwe) deur sy voorvaders vertel is dat hy, deur sy dogter Dzugundini te bevrug, aan haar reënskeppende magte sal skenk. 'n Ander verhaal betrek 'n skandaal in dieselfde hoofman se huis, waar die hoofman se seun Dzugundini bevrug het. Dzugundini is vir die voorval kwalik geneem en is gedwing om die nedersetting te ontvlug. Dzugundini het in die Molototsi-vallei aangeland, wat die hedendaagse Balobedu-koninkryk is.[1]

Die nedersetting wat sy met haar getroue volgelinge gestig het, is deur 'n Mugudu, of manlike leier, geregeer, maar die vrede en harmonie van die nedersetting is versteur deur wedywering tussen verskillende families. Derhalwe, om vrede in die land te herstel, het Mugudo sy eie dogter bevrug om die stam se matrilineêre tradisie te herstel. Sy het aan die eerste reënkoningin, bekend as Modjadji, geboorte geskenk. Modjadji beteken "regeerder van die dag".

Erkenning

Op 31 Maart 2016 het president Zuma bekend gemaak dat die reënkoningin in Suid-Afrika amptelik erken word. Masalanabo Modjadji, wat toe 11 jaar oud was,[2] sal die troon bestyg as koningin wanneer sy 18 jaar oud word. Haar oom Mpapatla Modjadji neem ondertussen as regent waar.[3]

Voormalige reënkoninginne
  1. Koningin I Maselekwane Modjadji (1800–1854)
  2. Koningin II Masalanabo Modjadji (1854–1894)
  3. Koningin III Khetoane Modjadji (1895–1959)
  4. Koningin IV Makoma Modjadji (1959–1980)
  5. Koningin V Mokope Modjadji (1981–2001)
  6. Koningin Makobo Modjadji VI (2003-2005)
  7. Prins Regent Mpapatla Modjadji (2005-2022)
  8. Koningin Masalanabo Modjadji VII (2023–)

Verwysings
  1. "The BaLobedu People" (in Engels). Geargiveer vanaf die oorspronklike op 25 Mei 2020. Besoek op 18 Mei 2020.
  2. "Sowetan 10 Okt 2015" (in Engels). Geargiveer vanaf die oorspronklike op 14 Februarie 2019.
  3. "Sowetan" (in Engels). 30 Mei 2016. Geargiveer vanaf die oorspronklike op 27 Oktober 2018.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.