Quirinaal

Die Quirinaal (in Afrikaans soms ook Kwirinaal gespel; Latyn: Collis Quirinalis; Italiaans: Quirinale) is een van die oorspronklik sewe heuwels waarop Rome ontstaan het. Die heuwel het in die Romeinse Keisertyd 'n sterk residensiële karakter gehad, met die Baddens van Diocletianus en die kleiner Baddens van Konstantyn as twee groot openbare geboue wat in die 4de eeu n.C. temidde van woonkwartiere ontstaan het.

Die sewe historiese heuwels van Rome

Gedurende die Middeleeue, toe Rome net 'n bevolking van enkele duisend gehuisves het, het die Quirinaal onbewoon gebly. Eers in die 16de eeu het 'n pouslike somerwoning, die Quirinaalpaleis, op die heuweltop ontstaan waar in die somermaande, wanneer Rome deur hitte geteister word, meestal 'n aangename vars bries waai. Rome se groot adellike families, onder wie die Colonna en Aldobrandini, het vir hulself paleise teen die Quirinaal se hellings laat bou.

Met die vereniging van Italiaanse state in 'n gemeenskaplike Koninkryk Italië het die omgewing ingrypende veranderinge ondergaan en is talle historiese paleise deur nuwe monumentele geboue vervang, veral langs die besige Via Nazionale, een van die hoofverkeersare van moderne Rome.