Pyrex

Pyrex (as handelsnaam meestal gestileer as PYREX) is 'n handelsmerk vir hittebestande borosilikaatglas wat hoofsaaklik in bak- en kookgerei asook laboratoriumtoerusting gebruik word. Ander moontlike toepassings is brilglas, teleskope en elektroniese komponente.




Handelsmerk vir kook- en bakgerei
in besit van Corning Inc.

Lisensiehouers

Noord-Amerika:

World Kitchen, LLC
Rosemont, Illinois
Vlag van Verenigde State van Amerika Verenigde State

Europa, Midde-Ooste, Afrika:

International Cookware
Roissy
Vlag van Frankryk Frankryk

Handelsmerk vir laboratoriumglas

in besit van Corning Inc.

Corning, New York
Vlag van Verenigde State van Amerika Verenigde State

Webtuistes
pyrex.eu - International Cookware
World Kitchen, LLC Geargiveer 15 April 2016 op Wayback Machine
Corning - Pyrex Labware

Die handelsmerk is in 1908 deur die Amerikaanse onderneming Corning Inc. ingevoer. Elf jaar later, op 27 Mei 1919, is Corning se Pyrex-glasformule gepatenteer.[1]

Twee glasmaatbekers wat volgens verskillende formules vervaardig is. Aan die linkerkant: World Kitchen se getemperde glas (sodakalkglas, met 'n kenmerkende blouerige tint), regs: Corning se borosilikaatglas.

Corning het die vervaardiging van Pyrex-kook- en bakgerei, wat oorspronklik van borosilikaatglas gemaak is, in 1998 gestaak en die handelsmerklisensie daarvoor aan lisensiehouers soos World Kitchen, LLC en International Cookware oorgedra.

Ter wille van kostebesparing word Pyrex-produkte, wat tans in die Verenigde State deur World Kitchen bemark word, intussen van getemperde glas (sodakalkglas) vervaardig - in teenstelling met markte buite Noord-Amerika wat deur International Cookware bedien word en waar vasgehou word aan die gebruik van duurder borosilikaat vir die vervaardigingsproses.

Die grootste borosilikaat-glasoond ter wêreld word deur die Franse onderneming International Cookware in sy aanleg in Châteauroux in die département Indre bedryf.[2] International Cookware, wat oorspronklik deel uitgemaak het van die Franse ARC International-groep en sedert 2006 as Arc International Cookware (AIC) bekendgestaan het, is op 31 Januarie 2014 aan Amerikaanse beleggers verkoop[3] en maak tans deel uit van Aurora Resurgence se beleggingsportefeulje.[4]

International Cookware bemark as eksklusiewe lisensiehouer onder meer Pyrex-glaskook- en bakgerei op markte in Europa, die Midde-Ooste en Afrika.

Geskiedenis

22 jaar voordat Corning Inc. sy Pyrex-produklyn begin vervaardig het, is borosilikaatglas vir die eerste keer in 1893 deur die Duitse skeikundige en glastegnikus Otto Schott, die stigter en naamgewer van die bekende Duitse glasvervaardiger Schott AG, vervaardig. Schott het sy produk onder die naam Duran bemark.

In 1908 het Eugene Sullivan, die navorsingsdirekteur van Corning Glass Works, 'n borosilikaatglas met lae termiese uitsetting ontwikkel wat vir die vervaardiging van skokbestande lanterngloeilampe en batterybekers gebruik kon word. As doktorale student in Leipzig, Duitsland het Sullivan kennis gekry van Schott se borosilikaatglas.

Corning se eerste oondvaste Pyrex-glasbakke het hul verskyning in 1915 gemaak

Jesse Littleton, 'n fisikus en personeellid van Corning, het die potensiaal van borosilikaatglas as kookgerei raakgesien toe hy in 1913 vir sy vrou 'n kasserolbak gegee het wat hy vervaardig het deur 'n Nonexglas-batterybeker uitmekaar te haal. Nonexglas was 'n vroeë voorloper van Pyrex wat weens die gebruik van lood in sy formule nog nie geskik was vir die vervaardiging van bak- en kookgerei nie. Corning het die formule aangepas om 'n loodvrye variant te ontwikkel wat deur die Philadelphia Cooking School noukeurig getoets is.

In 1915, gedurende die Eerste Wêreldoorlog, is Pyrexglas-bak- en kookgerei as 'n Amerikaans-vervaardigde alternatief tot die Duitse Duranglas aan die publiek bekendgestel.[5] Aanvanklik is die Pyrex-reeks in die Jordan Marsh-afdelingswinkel in Boston verkoop. Vier jaar later, in 1919, is 'n afsetsyfer van 4,5 miljoen eenhede behaal.

Pyrex-glas het in 1915 ook ingang gevind tot Amerikaanse laboratoriums. Glasware vir wetenskaplike toepassings is oorspronklik uit Duitsland ingevoer, maar as gevolg van die oorlog is die Verenigde State van dié invoere afgesny. Corning het die leemte in die mark met sy Pyrex-glas gevul, en danksy sy hoë gehalte is die meeste ingevoerde produkte kort voor lank deur Pyrex vervang. Tans word Corning se glasprodukte in laboratoriums dwarsoor die wêreld aangetref.

Verwysings
  1. glassian.org: United States Patent Office - Pyrex glass formula Patent No. 1,304,623. Besoek op 12 April 2016
  2. La Nouvelle République, 11 Februarie 2014: "Nous sommes la seule usine au monde à fabriquer le Pyrex". Besoek op 13 April 2016
  3. "Arc International - Our History. Besoek op 13 April 2016". Geargiveer vanaf die oorspronklike op 1 Desember 2011. Besoek op 12 April 2016.
  4. Aurora Resurgence - Portfolio. Besoek op 13 April 2016[dooie skakel]
  5. How Products Are Made - Volume 7: Pyrex. Besoek op 13 April 2016

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.