Pous Formosus

Pous Formosus is ongeveer in 816 in Perello, Korsika, gebore . In 864 tydens die bewind van Pous Nicolaas I word hy ingewy as kardinaalbiskop van Porto. Hy reis in 866 na Bulgarye, en na Duitsland en Frankryk in 869 en 872, om die Rooms-Katolieke Kerk te bevorder. Formosus oorreed Karel die Kale, koning van Frankryk, om hom deur die pous te laat kroon. Pous Johannes VIII het die talentvolle Formosus as 'n bedreiging gesien en het hom in 872 afgedank en van verraad beskuldig omdat hy sy bisdom sonder toestemming verlaat het en omdat hy openlik na die pousskap gestrewe het. Johannes se opvolger Pous Marinus I het die beslissing in 883 ongedaan gemaak. Formosus was bekend as diplomaat en het 'n sterk invloed op die sinode van 869 uitgeoefen. Op 6 Oktober 891 volg hy Pous Stefanus V op en regeer tot sy dood op 4 April 896. Hy word opgevolg deur Pous Bonifatius VI. Die naam ‘Formosus’ beteken 'pragtig'.

Pous Formosus het sy talent vir diplomasie gebruik om die verhoudings tussen Rome en Konstantinopel te verbeter. Hy het ook die Christendom in Noord-Europa versterk. Formosus was haaks met hertog Guido III van Spoleto, maar kroon hom tog as keiser van die Heilige Romeinse Ryk in April 892.

Formosus het Arnolf van Karintië oorgehaal om die Italiaanse skiereiland binne te val en beheer oor Italië oor te neem. In 894 het Arnolf se leër die gebied noord van die Po-rivier beset. Hertog Guido III van Spoleto is dood in Desember 894 en sy jong seun, keiser Lambert word deur sy vrou Agiltrude grootgemaak. In die herfs van 895 onderneem Arnolf sy tweede veldtog na Italië en in 896 word hy deur die pous tot keiser van die Heilige Romeinse Ryk gekroon. Die nuwe keiser het Spoleto probeer aanval, maar het verlam geraak en kon nie sy kampanje voltooi nie.

Na sy dood is sy lyk op bevel van Pous Stefanus VI (VII), onder aanstigting van Lambert en Agiltrude, opgegrawe en aan 'n skynproses onderwerp wat later bekend geword het as die 'Kadawersinode'. Formosus is veroordeel, drie vingers van sy regterhand is afgekap en sy lyk is in die Tiber gegooi, maar deur 'n monnik uitgehaal en begrawe. In November 897 het Pous Theodorus II die besluite van die kadawersinode geannuleer en Formosus in die Sint Pieterskerk laat begrawe. Later het Pous Sergius III die lyk weer laat opgrawe, dit laat onthoof en weer in die Tiber-rivier gegooi.

• Duff, Eamon (2001). Saints and Sinners: A History of the Popes, Yale University Press. ISBN 0-300-09165-6
• Maxwell-Stuart, P. G. (2002). Chronicle of the Popes: The Reign-by-Reign Record of the Papacy from St. Peter to the Present, Thames & Hudson. ISBN 0-500-01798-0.

• CE Inskrywing in die Catholic Encyclopedia (Engels)

• BBKL Inskrywing (met Literatuurverwysings) in die Biographisch-Bibliographisches Kirchenlexikon (Duits)
• PTA Inskrywing in "Popes through the Ages" deur J. Brusher S.J. (Engels)

Saamgestel en vertaal uit die Nederlandse, Engelse, Duitse en Franse wikipedia en aangevul uit ander bronne soos aangedui.