Porterville

Die dorp is in 1863 op die plaas Pomona, voorheen Willemsvallei, uitgelê. Die oorwegend bruin laerskool hier dra die naam Willemsvallei. Dit het munisipale status verkry in 1903 en is vernoem na William Porter, prokureur-generaal van die Kaapkolonie van 1839 tot 1866.

Porterville se munisipale raad het in 1969 'n wapenverlening van die Kaaplandse provinsiale administrateur verkry: In goud, 'n golwende blou dwarsbalk in die skildhoof regs vergesel van 'n rooi disablom en oor alles heen 'n horing van oorvloed van silwer waaruit 'n geblaarde druiwetros en koringare van natuurlike kleur kom. Die helmteken was 'n olifant, en die wapenspreuk "Felicitas et justitia".[2] Die wapen is in 1972 by die Buro vir Heraldiek geregistreer.[3]

Dit is die sentrum van 'n landbougebied wat graan, wyn en vrugte lewer.

Die plaas Willemsvallei, wat geleë was in die wyk Vier-en-twintig Riviere, was aanvanklik deel van die gemeente Tulbagh en het later onder die gemeente Piketberg geval. In 1860 het die plaas Willemsvallei in die besit gekom van ene mnr. Frederick John Owen, wat in 1863 'n deel van die plaas in erwe laat opmeet en aan die publiek verkoop het. So is die grondslag van die nuwe dorp gelê. In 1869 is die eerste dagskool deur bemiddeling van ds. (later professor) P.J.G. de Vos, destyds predikant van Piketberg hier gestig. Ds. C. Rabie, wat ds. De Vos in 1869 op Piketberg opgevolg het, word as die vader van die plaaslike gemeente beskou. Op 25 Februarie 1879 is die gemeente Porterville van Piketberg afgestig. Prop. M.C. Mostert is op 4 Maart 1881 as eerste leraar georden en bevestig. Ds. Mostert het die gemeente tot op 6 September 1920 bearbei. Intussen is 'n tweede kerkgebou in 1891 ingewy. Dit het spoedig te klein geword totdat die derde en huidige kerkgebou op 18 November 1925 ingewy is. Dit word beskou as een van die sierlikste en stewigste kerkgeboue in die Wes-Kaap en is deur die vermaarde argitek Wynand Louw ontwerp.

• Lys van dorpe in Suid-Afrika

• Phil Olivier, Ons gemeentelike feesalbum. Kaapstad en Pretoria: N.G. Kerk-uitgewers, 1952.
• Raper, P.E., Dictionary of South African Place Names, Lowry Publishers, Johannesburg, 1987.