Pietie Victor

Peter Daniel Victor (Wynberg, 18 Augustus 1935 - Durbanville, 19 September 2003) was 'n leraar in die Nederduitse Gereformeerde Kerk wat wyd bekend was vir sy werk onder haweloses en sy onomwonde politieke oortuigings. Hy is op 19 September 2003 tydens 'n skietgeveg met rowers in Durbanville doodgeskiet toe hy sy buurvrou probeer help het.

Victor het in Wynberg en Observatory op die Kaapse Skiereiland grootgeword. Hy was die derde van die vier kinders van Johannes Jacobus Victor, self die jongste van tien kinders, gebore op sy ouers se plaas in die Moordenaarskaroo, wat hulle tydens die Anglo-Boereoorlog verloor het. Sy moeder was Adriana Maria Prins, die oudste van twee kinders wat op Ceres grootgeword het. Ná matriek het sy vader Kaap toe getrek waar hy by die Kaapse stadsraad gaan werk het en ná jare lange diens as hoof van die tekenaarskantoor (elektries) afgetree het.

As kind was Victor baie siek weens asma, allergieë en 'n longkwaal en dokters het nie gedink hy so 'n volwasse leeftyd bereik nie, maar hy was van kleins af 'n vegter en het heeltemal herstel. Later het hy vir die eerstespan rugby gespeel en op die atletiekbaan talle rekords laat spat. Hy het sy skoolopleiding aan die Laerskool Nassau in Observatory begin en aan die Hoërskool Nassau in Mowbray in 1952 voltooi. Die skoolleuse, "Ek sal handhaaf", het ook sy lewensleuse geword. In Wynberg was hy voorsitter van die KJV, koorlid en voorsitter van die grootste volkspele-laer in die gebied. In die geskiedkundige NG gemeente Wynberg was hy diaken, ouderling en later predikant.

Victor is op 21 Mei 1960 getroud met Anna Aletta Prins in die NG kerk Wellington-Noord. Annette is 'n gekwalifiseerde maatskaplike werker wat haar man bygestaan en ondersteun het. Twee dogters is uit die huwelik gebore. Dr. Lizann Victor is 'n dokter in Kaapstad en Madri Gerber 'n boekhouer in Nederland. Albei dogters het aan die Hoërskool Groote Schuur in Nuweland gematrikuleer.

Victor het in 1971 ná sy studie aan die Universiteit van Stellenbosch die NG Kerk se straatwerkaksie begin, eers in die St. Stephen's-kerk en later in die Trovato-rehabilitasiesentrum in Wynberg. Hy was van 1985 tot 1996 leraar van die NG gemeente Wynberg.