Pannekoek
’n Pannekoek is ’n gereg, dikwels dun en rond, wat van meel, eier, melk en ’n bietjie sout gemaak en in ’n pan met verhitte olie gebak word. Die pannekoek word met ’n spaan omgedraai of in die lug opgeskiet sodat dit op die rou kant in die pan terugval. Volgens argeologiese bewyse is pannekoek waarskynlik die eerste en mees algemene graangereg wat in prehistoriese gemeenskappe geëet is.[1]
| Pannekoek | ||
 | ||
| Pannekoek met kaneelsuiker. | ||
| Soort gereg | Deeggebak | |
| Land | Wêreldwyd | |
| Hoofbestanddeel | Meel, eier, melk | |
| Variasies | Talle | |
| Soortgelyke geregte | Wafels, plaatkoekies | |
Die pannekoek se vorm en struktuur verskil wêreldwyd. In Noord-Amerika word ’n rysmiddel (gewoonlik bakpoeier) gebruik om ’n dik, donsige pannekoek te maak. ’n Crêpe is ’n dun Franse pannekoek wat aan een of albei kante in ’n spesiale pan gebak word om ’n kantagtige netwerk van fyn borrels te kry. In Brittanje is die beslag dikwels ongesuur en lyk dit soos ’n crêpe.[2] ’n Bekende variasie uit Suid-Europa is ’n palačinke, ’n dun en klam pannekoek wat aan albei kante gebak en met konfyt, roomkaas, sjokolade, ens. gevul word.
Wanneer aartappels gebruik word as ’n groot deel van die beslag, is die resultaat ’n aartappelpannekoek. Wanneer karringmelk in plaas van of saam met melk gebruik word, het die pannekoek ’n tertsmaak – dié karringmelkpannekoeke is algemeen in Skotland en die VSA. Soms word bokwietmeel gebruik vir pannekoeke soos blini, kaletez en ploye uit onderskeidelik Rusland, Bretagne en Kanada. In baie lande is kommersieel bereide bestanddele te koop.
Pannekoeke kan enige tyd van die dag voorgesit word met ’n verskeidenheid vulsels soos konfyt, vrugte, stroop of vleis. In Suid-Afrika word pannekoeke dikwels met kaneelsuiker bestrooi. In Amerika word dit hoofsaaklik as ’n ontbytgereg beskou.
Soortgelyke geregte is wafels en plaatkoekies.
Geskiedenis
Die eerste pannekoeke is moontlik op warm klippe gebak. Dit is egter as te basies en eenvoudig beskou om as resep neergeskryf te word. Die oudste aangetekende resep genaamd panckoecken kom in die Hollandse kookboek Een Notabel boecxken van cokeryen (1514) voor; dit is egter eerder platbrood as pannekoek. Ware pannekoekresepte is eers in 17de-eeuse Nederlandse resepteboeke aangeteken.[3]
Rekords
Die Guinness World Records lys verskeie rekords betreffende pannekoeke, onder andere:
- Die meeste pannekoeke wat 'n mens in een uur kon maak is 1 092. Die rekordhouer is Ross McCurdy van Kingston, Washington.
- Die meeste mense wat op 'n slag saam pannekoeke gebak het, is 890 by 'n geleentheid van die Universiteit van Sheffield. Die rekord staan sedert 15 Februarie 2012.
- Die vinnigste pannekoekomkeerder is die Australiër Brad Jolly, wat 140 "flips" in 6 sekondes kon doen. Sy rekord staan sedert 2012.
- Die hoogste wat 'n pannekoek nog in die lug geskiet is, is 9,47 m in 2010.
- Die grootste pannekoek is in 1994 in Manchester gemaak: 15,01 meter in deursnee en 2,5 cm dik, met 'n massa van 3 ton.
Galery
Amerikaanse pannekoeke met bloubessiesous.
Japannese okonomiyaki, ’n sout pannekoek met ’n verskeidenheid bestanddele.
Deense æbleskiver word berei.
Franse socca wat net uit die oond kom in die ou stad van Nice aan die Franse Riviera..jpg.webp)
’n Outomatiese pannekoekmasjien.
Inuïet-bannock.
’n Nederlandse babapannekoek..jpg.webp)
Amerikaanse Johnnycakes.
Amerikaanse silver dollar pancakes.
’n Newfoundlandse touton (regs bo) saam met ander ontbytkos.
’n Indiese dosa.
Verwysings
- Jones, M. Feast; Why Humans Share Food, Oxford University Press, 2007
- Nelson, Libby (29 November 2015). "British desserts, explained for Americans confused by the Great British Baking Show" (in Engels). Vox. Geargiveer vanaf die oorspronklike op 4 Februarie 2020. Besoek op 3 Desember 2015.
- Dutch baby – 'n pronkerige pofpannekoek vir somerweer, huiskok.com, besoek op 28 Februarie 2016
Eksterne skakels
Wikimedia Commons het meer media in die kategorie Pannekoek.
Wikiwoordeboek het 'n inskrywing vir pannekoek.
