Paleis van Beaulieu

Die Paleis van Beaulieu (Engels: Palace of Beaulieu), ook bekend as New Hall, was noord van Chelmsford in Essex, Engeland, geleë.

Die Paleis van Beaulieu omstreeks 1580.

Nadat dit verskeie kere van eienaar verwissel het, is dit in 1516, teen daardie tyd bekend as New Hall, aan koning Hendrik VIII verkoop teen £1 000 (in vandag se geld £421 000 of sowat R5 miljoen). Die koning het die huis in steen laat herbou teen £17 000, ’n groot bedrag in dié tyd.[1] Hy het sy paleis die nuwe naam Beaulieu gegee, wat mooi plek beteken.

Op 23 Julie 1527 het Hendrik se hof by Beaulieu aangekom waar hulle, baie ongewoon, langer as ’n maand gebly het. In die geselskap was verskeie adellikes en hul vroue, onder andere Thomas Boleyn, burggraaf Rochford, die pa van Anna Boleyn. Dit is hier waar Hendrik, wat toe nog met Katherina van Aragon getroud was, planne beraam het om met Anna te trou.[2]

In Oktober 1533 is die dogter van koningin Katherina, Maria (later Bloedige Maria), wat geruime tyd hier gebly het, uit die huis gesit omdat die paleis kort tevore aan Anna se broer, George Boleyn, toegesê is. George was voorheen ’n opsigter van Beaulieu. Volgens die koninklike inventaris van 1547 was daar onder meer 29 groot beddens, vier badkamers met houtvloere en ’n biblioteek.[3]

Nadat Anna Boleyn onthoof is en Hendrik met Jane Seymore getrou het, het sy nuwe vrou hom oorreed om sy twee dogters uit sy vorige huwelike terug te bring na die koninklike hof. Maria is daarna toegelaat om weer in onder andere Beaulieu te bly. Anna Boleyn se dogter, koningin Elizabeth I, het die landgoed in 1573 aan Thomas Radcliffe, die 3de Graaf van Sussex, toegeken en hy het die noordelike vleuel laat herbou. Kort daarna het hy Elizabeth se koninklike wapen bo die hoofingang laat aanbring, waar dit steeds is. Dis is daarna vir £30 000 verkoop.

Tydens die Engelse Burgeroorlog het Oliver Cromwell in 1640 vir vyf sjielings besit geneem van die landgoed. Daarna het die landgoed weer verskeie kere van eienaar verwissel. In 1798 het Engelse nonne dit gekoop en ’n Katolieke skool daar geopen. New Hall-skool bestaan vandag nog en die koninklike wapen van Hendrik VIII hang in die skool se kapel.

In Februarie 2009 het die Time Team van die Britse Channel 4 opgrawings op die terrein gedoen. Die kapel, westelike vleuel en hekhuis is gevind.[4]

Verwysings
  1. Maurice Howard, The Early Tudor Country House: Architecture and politics 1490–1550 George Philip, 1987, p.205
  2. Warnicke, Retha M. The Rise and Fall of Anne Boleyn: Family Politics at the Court of Henry VIII. Cambridge University Press, 1989.
  3. Starkey, David, ed., The Inventory of Henry VIII, vol. 1, Society of Antiquaries, (1998), 341-343.
  4. "argiefkopie". Geargiveer vanaf die oorspronklike op 21 Februarie 2009. Besoek op 24 Maart 2012.

Eksterne skakels

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.