Orrie Baragwanathpas

Orrie Baragwanathpas is in die Limpopoprovinsie op die ongenommerde pad tussen Ofcolaco en Lebowakgomo (Suid-Afrika) geleë. Die pas het 'n steil geplaveide styging van die ooste af teen die hange van die verre noordelike Drakensberge tot 'n hoogte van 1370 m bo seespieël. Van die weste af is daar 'n ewe steil maar ongeplaveide opdraande met 'n redelik plat ongeplaveide gedeelte van ongeveer 10 kilometer langs die kruin tussen die twee benaderings. Alhoewel die grootste deel van die pas in die Lekgalameetse Provinsiale Park geleë is, is dit nietemin 'n openbare pad met gratis toegang. Toegangsfooi is betaalbaar indien die pas vanaf die Lekgalameetse-ingangshek betree word.