Ooskus-longvis

Die Ooskus-longvis (Protopterus amphibius) is 'n varswatervis wat in die kusgebiede van Oos-Afrika tussen Somalië en Kenia voorkom, asook die delta van die Zambezirivier.[1]

Ooskus-longvis
Bewaringstatus
Veilig  (IUCN 3.1)
Wetenskaplike klassifikasie
Domein:	Eukaryota
Koninkryk:	Animalia
Filum:	Chordata
Subfilum:	Vertebrata (Cuvier, 1812)
Infrafilum:	Gnathostomata
Superklas:	Osteichthyes (Huxley, 1880)
Klas:	Sarcopterygii
Subklas:	Dipnoi
Superorde:	Ceratodontimorpha
Orde:	Lepidosireniformes
Familie:	Protopteridae
Genus:	Protopterus
Spesie:	P. amphibius
Binomiale naam
Protopterus amphibius (Peters, 1844)
Sinonieme
Rhinocryptis amphibia Peters 1844

Die Ooskus-longvis se voorkoms is eenders as dié van die Suider-Afrikaanse longvis, met sagte, ronde skubbe en 'n verlengde lyf wat tot 'n punt afgespits is. Die vis het slanke bors- en buikwinne wat ook afgespits is, terwyl sy rug- en anaalvin slegs sagte strale het. Die borsvinne het breë vliese. Sy kop is groter as dié van die Suider-Afrikaanse longvis en sy rugvin is ook nader aan sy kop; die afstand tussen sy snoet en sy rugvin is tussen 1,4 en 1,7 maal die koplengte.

Ooskus-longvisse is 'n egalige blougrys of leikleurig met onopvallende swart kolletjies; hulle pense is liggrys en hulle koppe is donker van onder met wit kolletjies of kronkelstrepies. 'n Gemiddelde volwasse vis het 'n totale lengte van 412 mm.

Soos die naam te kenne gee, het 'n longvis 'n long waarmee hy asem kan haal en wat hom in staat stel om in die suurstofarme waters van tropiese panne, vleie en moerasse te lewe. 'n Kenmerkende eienskap van die longvis is dat hy in staat is om, wanneer die watervlak sak, 'n holte in die sagte afsaksels te grawe. Hy versteek hom dan in die holte en skei 'n slymkokon af om die opening te vul. Die longvis kan dan vir sewe tot agt maande in 'n rustende toestand in hierdie holte bly (estivering), tot sy habitat weer oorstroom word. Tydens hierdie periode haal hy asem deur 'n gaatjie in die kokon.

Hierdie vis is 'n onskadelike vis en van min kommersiële waarde vir die mens: dit word deur plaaslike inwoners gevang, maar die presiese verkoopwaarde is nie bekend nie. Die Ooskus-longvis is redelik kwesbaar vir bedreiging.