Oog van Horus

Die Oog van Horus is ’n Antieke Egiptiese simbool van beskerming, koninklike mag en goeie gesondheid. Die oog word verpersoonlik deur die godin Wadjet. Dit word soms gelykgestel aan die Oog van Ra,[1] maar in ander gevalle is dit 'n heel ander konsep.

Die Oog van Horus.

Wadjet was een van die vroeë godinne wat ná die vereniging van Bo- en Benede-Egipte saam met Nechbet die twee beskermgodinne van Egipte geword het.

Horus

Horus was die Antieke Egiptiese god van die hemele wat gewoonlik as ’n valk uitgebeeld is. Sy regteroog is verbind met die songod, Ra. In een mite veg Set en Horus om die troon ná Osiris se dood en ruk Set Horus se linkeroog uit. Die grootste deel van die oog is herstel deur óf Hathor óf Thoth. Nadat Horus se oog herstel het, het hy dit aan sy pa, Osiris, aangebied in die hoop om hom weer lewend te maak. Daarom was die oog dikwels die simbool van opoffering, heling, restourasie en beskerming.[2]

Verwysings
  1. Wörterbuch der ägyptischen Sprache 1, 268.13
  2. Pinch, Geraldine (2004). Egyptian Mythology: A Guide to the Gods, Goddesses, and Traditions of Ancient Egypt. Oxford University Press. pp. 131–132

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.