Onafhanklikheidsdag (Verenigde State)

In die Verenigde State is die Onafhanklikheidsdag (Engels: Independence Day, dikwels ook Fourth of July, July Fourth of America Day genoem) 'n federale openbare vakansiedag ter herdenking van die aanvaarding van die Onafhanklikheidsverklaring van die Verenigde State op 4 Julie 1776, waarmee die land die koloniale bewind van Groot-Brittanje afgeskud het.

Vuurwerk oor die Washington-monument in Washington, DC
Onafhanklikheidsdagparade in Washington, DC
'n Pragtig versierde Onafhanklikheidsdagkoek

Die Onafhankliheidsdag word gewoonlik met vuurwerke, parades, braaie, bier, pieknieks, bofbal-wedstryde en talryke ander private en openbare plegtighede geassosieer waarmee die geskiedenis, regering en tradisies van die Verenigde State gevier word. Vuurwerke word sedert die jaar 1777 op 4 Julie afgevuur.

Geskiedkundige feesvierings
  • In 1777 is dertien kanonne op 4 Julie in Bristol (deelstaat Rhode Island) afgevuur - die eerste keer soggens en 'n tweede keer teen sononder. Philadelphiahet die eerste verjaarsdag van die onafhanklikheid net soos huidige Amerikaners met 'n amptelike dinee vir die Kontinentale Kongres, heildronke, 'n saluut van dertien kanonne, toesprake, gebede, musiek, parades en vuurwerk gevier. Skepe is met rooi, wit en blou vlagdoeke versier.
  • In 1778 het generaal George Washington 4 Julie met 'n dubbele rantsoen rum vir sy soldate en 'n artillerie-saluut gevier. Anderkant die Atlantiese Oseaan het die ambassadeurs John Adams en Benjamin Franklin as gashere van 'n dinee vir hulle Amerikaanse landgenote in die Franse hoofstad Parys opgetree.
  • In 1779 het die Onafhanklikheidsdag op 'n Sondag geval. Die openbare vakansiedag is derhalwe op Maandag, 5 Julie gevier.
  • In 1781 was die parlement van Massachusetts die eerste wat die openbare vakansiedag op 4 Julie amptelik erken het.
  • In 1783 het aanhangers van die Morawiese kerk in Winston-Salem (Noord-Carolina) die eerste feesviering in die land aangebied wat met 'n ambisieuse musiekprogram verbind is. Johann Friedrich Peter het die program saamgestel en die Psalm of Joy gekomponeer.
  • In 1791 is vir die eerste keer die term "Onafhanklikheidsdag" vir 4 Julie gebruik.
  • In 1870 het die Amerikaanse Kongres die Onafhanklikheidsdag tot 'n openbare vakansiedag vir werknemers van federale instellings verklaar - alhoewel dit destyds nog 'n onbetaalde vakansiedag was.
  • In 1941 het die Kongres van 4 Julie 'n betaalde federale vakansiedag gemaak.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.