Nuwe Apostoliese Kerk
Die Nuwe Apostoliese Kerk is 'n internasionale millinialistiese Christelike gemeenskap wat uit die Katoliek Apostoliese Kerk ontstaan het.
Geskiedenis
In 1855 sterf drie van die 12 Apostels van die Katoliek Apostoliese Kerk. 'n Vraagstuk ontstaan of die vakante poste weer gevul moet word. Die oorblywende Apostels besluit om nie weer Apostels aan te stel nie.
Hierdie besluit lei daartoe dat die Hamburgse gemeente onder leiding van Heinrich Geyer en F.W. Schwartz self 'n Apostel aanstel. Hierdie persoon weier om die aanstelling te aanvaar en Geyer en Schwartz word uit die Katoliek Apostoliese Kerk verban deur Apostel Woodhouse.
Die Hamburgse gemeente breek weg en in 1863 word Priester Louis Preuss aangewys as die gemeente se Apostel. Later in dieselfde jaar word F.W. Schwartz aangewys as die Apostel vir Nederland en Belgie.
In 1895 sterf Schwartz en Friedrich Krebs neem die leiding van die kerk oor. Onder hom word die amp van Stamapostel ingestel. Krebs sterf in 1905 en word opgevolg deur Hermann Niehaus wat die kerk se naam amptelik verander na Nuwe Apostoliese Kerk.
Die Nuwe Apostoliese Kerk in Suid-Afrika
In 1889 word Evangelis Carl George Klibbe deur die Apostel vir Australië, H.F. Niemeyer na Suid-Afrika gestuur om die Kerk te vestig. Aanvanklike pogings om 'n gemeente te stig in Bellville en Worcester was onsuksesvol. Klibbe stig egter die eerste gemeente in Southernwood, Oos-Londen in 1892.
Op 8 Julie 1893 word Klibbe in Australië deur Niemeyer as Apostel verordineer vir Afrika as sy verantwoordelikheid. Die eerste verseëlingsdiens vind plaas op 10 April 1904 in Woodstock.
'n Vervreemding vind plaas tussen Klibbe en die Stamapostel, Hermann Niehaus in Duitsland. In 1913 word Klibbe van sy amp onthef, en Wilhelm Schlaphoff word in sy plek as Apostel aangestel.
'n Skeuring vind plaas wat lei tot 'n hofsaak in 1926, wat buite die hof beslis is. In die beslissing neem Klibbe voor dat sy kerk bekend sal staan as die Ou Apostoliese Kerk van Afrika, en Schlaphoff se kerk as die Nuwe Apostoliese Kerk.
Wilhelm Schlaphoff sterf op 16 Augustus 1928 in Johannesburg tydens 'n besoek aan sy gemeentes. Die Stamapostel, Herman Niehaus wys Heinrich Franz Schlaphoff, Wilhelm Schlaphoff se seun as sy opvolger aan.[1]
Omstredenheid
Die “Boodskap van Bishoff”
In Desember 1951 maak Stamapostel J.G. Bischoff op tagtig jarige ouderdom sy Boodskap bekend. Volgens die “Boodskap” het Jesus Christus in 'n openbaring aan hom gesê dat die wederkoms sal plaasvind voor sy (Bischoff) se dood.
Die “Boodskap” is tot NAK leerstelling verhef, en alle Apostels en ampsdraers moes die boodskap aanvaar of die amp neerlê. Dit het daartoe gelei dat verskeie Apostels afgedank is, waaronder die Assistent-stamapostel, Peter Kuhlen, en die Suid-Afrikaanse Apostels, Philippus Jacobus Erasmus, Daniel Carel Smuts Malan en Heinrich Franz Schlaphoff. (Van Der Vyver: 61)
Hierdie Apostels wat afgedank is het die Verenigde Apostoliese Kerk gestig, waaronder die Apostoliese Eenheid die Suid-Afrikaanse tak daarvan is.
Stamapostel
Die Stamapostel is die hoogste amp in die Nuwe Apostoliese Kerk, en bestaan sedert 1896.
Geskiedenis
Die term was ingestel deur Friedrich Krebs en dit kan vergelyk word met die Roomse Katolieke siening van die senioriteit wat die Apostel Petrus gehad het onder die Apostels. Volgens die Nuwe Apostoliese Kerk was Petrus die eerste Stamapostel.
Stamapostels van die Nuwe Apostoliese Kerk:
| Naam | Geboorte-sterfte | Geboorteplek | Plek oorlede | Verantwoordelikheid |
| Friedrich Krebs | 1832–1905 | Elend (Harz) (Duitsland) | Braunschweig (Duitsland) | 1895–1905 |
| Hermann Niehaus | 1848–1932 | Steinhagen (Duitsland) | Quelle (Duitsland) | 1905–1930 |
| Johann Gottfried Bischoff | 1871–1960 | Unter-Mossau (Duitsland) | Karlsruhe (Duitsland) | 1930–1960 |
| Walter Schmidt | 1891–1981 | Neuemühle (Duitsland) | Dortmund (Duitsland) | 1960–1975 |
| Ernst Streckeisen | 1905–1978 | St. Gallen (Switserland) | Kaapstad (Suid-Afrika) | 1975–1978 |
| Hans Urwyler | 1925–1994 | Spiegel (Switserland) | Bern (Switserland) | 1978–1988 |
| Richard Fehr | 1938 - | Flaach (Switserland) | -- | 1988–2005 |
| Wilhelm Leber | 1947 - | Herford (Duitsland) | -- | 2005 - |
Funksie
Die Stamapostel lei die Nuwe Apostoliese Kerk. Die Stamapostel is die hoogste gesag ten opsigte van geloof. Tesame met die Distriksapostels bepaal hy die beleid van die kerk.
Die Stamapostel kan nuwe Apostels verordineer of ontslaan.
Geboue
- Kerkgebou
Kerk Tafelsig, Kaapstad
Kerk Oudtshoorn, Wes-Kaap
Kerk Swellendam, Wes-Kaap
Kerk Seapoint, Kaapstad
Kerk Somerset-Wes, Kaapstad
Kerk Barrydale, Wes-Kaap
Verwysings
- "argiefkopie". Geargiveer vanaf die oorspronklike op 24 Desember 2008. Besoek op 3 Oktober 2008.
- Van Der Vyver, I.W. So dwaal die Nuwe Apostoliese Kerk. 1982. Bybelkor. Kaapstad.
- Werner, F.W. Die dwaling van die Apostelsekte. Evangelie Uitgewers. Braamfontein.
Eksterne skakels
- http://www.nak.org/en/news/
- http://www.nac-sea.org.za/ Geargiveer 3 Januarie 2006 op Wayback Machine