Noloyiso Sandile

Noloyiso Sandile (gebore Nomusa Zulu; 1963 – 8 Julie 2020) was die regent van die koningshuis van die amaRharhabe,[1] een van die vele stamme van die Xhosavolk.

Sandile is in 1963 in Nongoma, Natal as Nomusa Zulu gebore.[2] Sy was die dogter van die destydse koning van die Zoeloenasie, Cyprian Bhekuzulu kaSolomon, en die suster van die vorige Zoeloekoning, Goodwill Zwelithini kaBhekuzulu.

Sy is in 1988 met Maxhoba Sandile van die amaRharhabe getroud en het die naam Noloyiso Sandile aangeneem. Haar huweliksmaat is in 1991 as die monarg van die amaRharhabe aangewys. Hy het in die amp gedien tot sy afsterwe in 2011. Sandile het toe die nasie se regent geword. Sy was veronderstel om die posisie te beklee totdat haar jong seun mondig word om haar op te volg.[3]

Sandile is op 8 Julie 2020 in Mdantsane, Oos-Kaap dood aan komplikasies met betrekking tot die koronavirus. Sy word oorleef deur haar broer, wie ook later in Maart 2021 gesterf het aan Covid-19, en haar twee kinders.[4]