Shabdrung Rinpoche

Shabdrung of Zhabdrung (ཞབས་དྲུང་, Wylie: zhabs-drung; "voor die voete van") was ’n titel wat in Tibet gebruik is wanneer na groot lamas verwys of hulle aangespreek is, veral dié van ’n erflike linie. In Bhoetan het die titel feitlik altyd verwys na Ngawang Namgyal (1594-1651), die stigter van die Bhoetanese staat wat as die Shabdrung Rinpoche bekend was, of een van die reïnkarnasies wat hom opgevolg het.

Ngawang Namgyal, die eerste Shabdrung van Bhoetan.

Ngawang Namgyal

Namgyal was die stigter van Bhoetan nadat hy die oorlogvoerende konininkryke in die gebied verenig het. In die Kagyu-skool van Tibettaanse Boeddhisme word hy naas Padmasambhava en Gautama Boeddha as die belangrikste figuur beskou.

Namgyal het ’n dubbele regeringstelsel in Bhoetan gevestig, waarvolgens die Druk Desi die administrasie van die land bestuur het; hy is bygestaan deur goewerneurs bekend as penlops. Die Je Khenpo het godsdienssake beheer. Ná Namgyal se dood in 1651 is hy opgevolg deur ’n reeks reïnkarnasies wat aan die hoof van die land sou gestaan het.

Om die mag van dié reïnkarnasies te verdeel, het die Druk Desi, Je Khenpo en penlops saamgesweer om nie net een nie, maar drie verskillende persone as Shabdrung te erken – een elk vir die liggaam, gees en spraak. Eindelik het die land weer verval in verskillende faksies wat mekaar die stryd aangesê het.

Die laaste Shabdrung

In 1907, in ’n poging om die disfunksionele regeringstelsel te hervorm, is ’n monargie gestig met Ugyen Wangchuck, die penlop van Trongsa, as die land se eerste koning.

Nadat die nuwe koningshuis teenstand gekry het van die sewende Shabdrung, Jigme Dorji,[1] is dié na ’n klooster gestuur om "af te tree". Hy is in 1931 dood. Hy was die laaste Shabdrung wat deur Bhoetan erken is.[2]:26–28[3]

Verwysings
  1. "'jigs med rdo rje". TBRC (in Engels). Tibetan Buddhist Resource Center. Geargiveer vanaf die oorspronklike op 27 Mei 2020. Besoek op 9 Mei 2014.
  2. Rose, Leo E. (1977). The Politics of Bhutan. Ithaca: Cornell University Press. ISBN 0-8014-0909-8.
  3. Rongthong Kunley Dorji (2003). "My understanding of Shabdrung". The Bhutan Today (in Engels). Geargiveer vanaf die oorspronklike op 3 Maart 2016. Besoek op 4 Maart 2009.

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.