Neubabelsberg

Neubabelsberg is 'n villawyk wat deel uitmaak van die Potsdamse stadsbuurt Babelsberg en omstreeks 1900 ontstaan het. Dit strek van die stadstreinstasie Griebnitzsee langs die Griebnitzmeer tot naby die kasteel Babelsberg.

Uitsig oor die Griebnitzmeer na Berlyn

Truman-villa in Neubabelsberg. Hier het die Amerikaanse president Harry S. Truman in 1945 sy toestemming vir die atoombom-aanval op Hirosjima gegee

Aanvanklik was Neubabelsberg 'n gewilde woonbuurt vir welvarende Berlyners en het later - vanweë sy nabyheid tot die rolprentateljees in Babelsberg - ook rolprentsterre soos Marika Rökk, Sybille Schmitz, Lilian Harvey, Willy Fritsch of Brigitte Horney gelok. Hier is ook die vroeëre gastehuis van die rolprentmaatskappy UFA geleë waar sterre soos onder meer Heinz Rühmann, Marlene Dietrich en Hans Albers gebly het terwyl hulle rolprente geskiet is.

Bekende argitekte soos Ludwig Mies van der Rohe, Hermann Muthesius en Alfred Grenander het in Neubabelsberg 'n aantal villa's gebou terwyl die argitekfirma Peter Behrens met sy medewerkers Walter Gropius, Adolf Meyer en Le Corbusier hier hul ontwerpe gemaak het.

In die tydperk van die Nasionaalsosialisme is talle Joodse inwoners gedwing om te emigreer. Hul huise is teen lae pryse verkoop of deur Nasionaalsosialistiese organisasies gebruik. Die villa van die UFA-regisseur Alfred Zeisler het as woonhuis van Marika Rökk en Georg Jacoby gedien, terwyl die Joodse bankier Jacob Goldschmidt se villa 'n NS-vroueskool gehuisves het. Die laaste Neubabelsbergse Jode is in Januarie 1943 deur die Gestapo vanuit 'n ouetehuis na 'n konsentrasiekamp gedeporteer. Net Otto Liebknecht, die broer van die politikus Karl Liebknecht, en sy Joodse eggenote het dié lot tot by die einde van die Tweede Wêreldoorlog in 1945 gespaar gebly.

Tydens die Potsdam-konferensie in 1945 het die onderhandelaars in Neubabelsberg gebly. Hier is onder meer die Churchill-, Stalin- en Truman-villa geleë. Die laasgenoemde gebou word vandag deur die politieke Friedrich-Naumann-stigting benut. Die huidige stadstreinstasie is in 1862 opgerig en oorspronklik Neubabelsberg genoem. Sy naam is in 1938 gewysig tot Babelsberg-Ufastadt, maar sedert 1949 staan dit bekend as Griebnitzsee.

Met die bou van die Berlynse Muur in 1961 is Neubabelsberg deur grensgeriewe van die Griebnitzmeer se oewer afgesny. Die treinstasie Griebnitzsee het 'n streng bewaakte Berlynse grenspos geword. Ná die stigting van die Oos-Duitse rolprentateljee DEFA is 'n aantal geboue in Neubabelsberg deur die Hochschule für Film und Fernsehen - 'n tersiêre instelling vir die opleiding van rolprent- en televisiepersoneel - benut.

Die eiendomsregte van enkele villas in Neubabelsberg het ná die Duitse hereniging in 1990 onduidelik gebly. Sommige huise staan leeg, hul tuine is verwaarloos.