Nefski-prospekt

Nefski Prospekt of Nefskilaan (Russies: Не́вский проспе́кт) is die hoofstraat van Sint Petersburg, Rusland. Dit is aanvanklik deur Pieter die Grote beplan as die begin van die pad na Nowgorod en Moskou, en loop van die Admiraliteitsgebou tot by die Moskou-stasie in Sint Petersburg. Daarna maak dit ’n draai by Wosstanija-plein en loop tot by die Aleksander Nefski-lawra.

Nefski Prospekt in Januarie 2010.
Die laan en die Admiraliteitsgebou in 1753.
Die laan naby die Nikolaas-stasie in die 1890's.

Die hoofattraksies sluit in die Stroganof-paleis, Kazan-katedraal, Dom Knigi ("Boekhuis"), Elisejef-handelsentrum, ’n halfdosyn 18de-eeuse kerke, ’n monument vir Katharina die Grote, ’n enorme 18de-eeuse inkopiesentrum, ’n middel-19de-eeuse afdelingswinkel, die Russiese Nasionale Biblioteek en die Anitsjkof-brug met sy perdestandbeelde. Die besige lewe in die laan is deur Nikolai Gogol beskryf in sy verhaal Nefski Prospekt. Fjodor Dostojefski het die laan dikwels as agtergrond gebruik in sy boeke, soos in Misdaad en Straf.

In die vroeë jare van die Sowjetunie (1918–'44) is die laan se naam verander na Proletkoelt-straat (Oelitsa Proletkoelta) ter ere van dié Sowjet-kunstenaarsorganisasie.[1] Ná die ondergang van die organisasie is die naam verander na Laan van 25 Oktober (prospekt 25-go Oktjabrja) na aanleiding van die dag van die Oktoberrewolusie.

Vandag is die grootste deel van Sint Petersburg se winkels en naglewe in of naby Nefski Prospekt, asook die stad se duurste woonstelle. Verskeie moltreinroetes loop daarheen.

Verwysings
  1. Lynn Mally, Culture of the Future: The Proletkult Movement in Revolutionary Russia. Berkeley, CA: University of California Press, 1990; bl. 44.

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.