Nancy Reagan

Nancy Davis Reagan (gebore Anne Frances Robbins, 6 Julie 1921 – 6 Maart 2016) was 'n Amerikaanse aktrise en die eggenote van Ronald Reagan, die 40ste president van die Verenigde State van Amerika. Gevolglik was sy van 1981 tot 1989 die Eerste Dame van Amerika.

Nancy Reagan
Nancy Reagan in 1983
Eerste Dame van die Verenigde State
Ampstermyn 20 Januarie 1981 – 20 Januarie 1989
President	Ronald Reagan
Voorafgegaan deur	Rosalynn Carter
Opgevolg deur	Barbara Bush
Eerste Dame van Kalifornië
Ampstermyn 3 Januarie 1967 – 6 Januarie 1975
Voorafgegaan deur	Bernice Brown
Opgevolg deur	Gloria Deukmejian
Persoonlike besonderhede
Gebore	(1921-07-06)6 Julie 1921 New York Stad, New York
Sterf	6 Maart 2016 (op 94) Bel Air, Los Angeles, Kalifornië
Politieke party	Republikein
Eggenoot/-note	Ronald Reagan (1952–2004; sy dood)
Kind(ers)	Patti Davis Ron
Alma mater	Smith College
Religie	Presbiterianisme
Handtekening

Reagan is in Manhattan in New York Stad gebore. Haar ouers is kort na haar geboorte geskei en sy word in Maryland groot. Sy het by haar oom en tannie gewoon terwyl haar ma waarnemende poste beklee het.

In die 1940's en 1950's het sy as aktrise in Hollywood-rolprente gespeel en kan in films soos Donovan's Brain, Night Into Morning en Hellcats of the Navy gesien word.

In 1952 trou sy met die akteur Ronald Reagan, wat destyds die president van die Screen Actors Guild was. Hulle het twee kinders, Ron en Patti, gehad. Van 1967 tot 1975 was sy die Eerste Dame van Kalifornië, toe haar man die goewerneur daar was.

Sy word die Eerste Dame van die Verenigde State na haar man se verkiesing as president in Januarie 1981. In haar eerste termyn is sy gekritiseer omdat sy die Withuis se porselein laat vervang het. Haar belangstelling in hoë-mode het ook baie aandag en kritiek uitgelok. Gedurende haar man se presidentskap het sy die anti-dwelmveldtog, "sê net nee", gevestig.[1]

Reagan het altyd haar man beskerm. In 1988 het sy vir omstredenheid gesorg toe dit aan die lig kom dat sy, ná die aanslag op haar man se lewe in 1981, 'n astroloog aangestel het om met die beplanning van sy dagboek te help. Sy het 'n sterk invloed op haar man gehad en 'n rol in sy besluite oor personeel en diplomatieke aangeleenthede gespeel.

Die Reagans het die Withuis in 1989 verlaat. Daarna bring sy die meeste van haar tyd deur om haar siek man, by wie Alzheimer se siekte in 1994 gediagnoseer is, tot en met sy dood in 2004 te versorg. Sy was daarna aktief by die Reagan-biblioteek en in die politiek betrokke.

Sy is op 6 Maart 2016 (op 94-jarige ouderdom) aan hartversaking oorlede. Sy is langs haar man by die Ronald Reagan Presidensiële Biblioteek in Simi Valley, Kalifornië, begrawe.