NG gemeente Meru

Die NG gemeente Meru was die enigste gemeente van die Nederduitse Gereformeerde Kerk in die destydse Tanganjika. Dit het 'n gebied so groot soos die Vrystaat beslaan.

Dr. Hendrik Christoffel de Wet, leraar van 1918 tot 1921.

Ds. Jacobus Delarey Conradie was leraar van Meru van 1927 tot 1929 en van 1929 tot 1936 van die NG gemeente Philipstown.

Ds. J.J. Booysen, leraar van 1938 tot 1939.

Ds. P.A.M. Brink, leraar van 1955 tot 1960.

Ná die Anglo-Boereoorlog het Afrikaners om verskeie redes na die destydse Duits-Oos-Afrika (Tanzanië) as 'n nuwe nedersettingsoord gegaan. Die eerste groep, bestaande uit 41 siele, is omstreeks Januarie 1904 daarheen. In 1905 volg 'n tweede trek en in dieselfde jaar is ds. A.P. Burger van Middelburg, Transvaal namens die Transvaalse Kerk daarheen om die eerste (en uiteindelik enigste) gemeente van die Kerk in Duits-Oos-Afrika te stig.

Die gemeente is vernoem na die berg Meru, wat ongeveer 60 km van Kilimandjaro geleë is en aan die voet waarvan plase aan Afrikanerboere toegesê is.

Daar is geen vaste leraar beroep nie, maar die gemeente sou vir die grootste deel van sy bestaan deur die konsulent (gewoonlik die leraar van 'n aangrensende gemeente) of tydelike werkkragte bearbei word. Die eerste besoekende leraar wat die sakramente aan die lidmate in Duits-Oos-Afrika kom bedien het, was ds. J.M. Louw van Boksburg wat in 1908 na Oos-Afrika gekom het om die tweede gemeente, op die dorpie Nakuru, sowat 160 km noord van Nairobi, te stig. Op 'n vraag of die mense nie reeds ver genoeg getrek het nie, is die gemeente se naam Vergenoeg gegee.

Maar die man wat die diepste spore in Oos-Afrika nagelaat het, was ds. M.P. Loubser. Hy was eers van 1909 tot 1914 tydelik in Vergenoeg werksaam en toe van 1925 - '35 die vaste leraar daar.

Meru het eers in 1945 sy eerste voltydse leraar gekry, maar intussen het die volgende konsulente of tydelike werkkragte die lidmate bearbei: ds. C.F. Mynhardt (1916-'17), dr. H.C. de Wet (1918-'21), di. G.J. van Zyl (1921-'24), J.D. Conradie (1927-'29), A.M. Murray (1930), B.J.K. Anderssen (1932-'35), J.J. Booysen (1937-'39).

Ds. Abraham Hugo Malan was die eerste voltydse leraar en staan in die gemeente van 1945 tot '48. Na sy vertrek bedien ds. J.H. Louw van Loubser die gemeente as konsulent en daarna ds. Chris Murray, wat na Loubser beroep is as medeleraar met opdrag om Meru as konsulentgemeente te bedien.