NG gemeente Kroonstad-Suid

Die NG gemeente Kroonstad-Suid is een van agt gemeentes van die Nederduitse Gereformeerde Kerk op die Vrystaatse dorp Kroonstad. Buiten Bloemfontein is die ander dorpe/stede in die Vrystaatse Sinode met die meeste gemeentes Welkom met sewe, Bethlehem met nege en Sasolburg met ses.

Ds. J.A.J. McDonald.

Weens die uiters snelle uitbreiding wat Kroonstad in die middel van die 20ste eeu ervaar het, het die kerkraad van die gemeente Kroonstad dit wenslik geag om 'n gemeente af te stig. So het op 24 Junie 1950 die gemeente Kroonstad-Suid met 'n ledetal van 650 tot stand gekom. As eerste kerkraadslede is die volgende gekies: ouderlinge: H.J. Otto, J.J. Geldenhuis, I. Mynhardt, C.M. Cronje, P.M. Botha, G.P. van Niekerk, F.S. Smith, R.P. Odendaal, R.M. van Huyssteen, S.I. Pienaar, P.W. Pretorius, H.L. Kleynhans en E.P. Kleynhans. Diakens: F.G.W. Botha, I.J.M. van Rooyen, C.P. Nothnagel, W.P. Wessels, J.H. Serfontein, P.R. Botha, G.D. Els, P J. van Niekerk, G.F.C. Troskie, G.P. Wilke, E. Gouws, J.H.P. Serfontein, G.J. Vosloo en T.J. Kleynhans. Tot scriba/kassier is die heer R.M. van Huysateen, 'n afgetrede skoolhoof, gekies.

Omdat 'n sierlike pastorie nog in aanbou was, is 'n leraar eers in Oktober 1950 beroep. Die keuse het op ds. J.A.J. McDonald van Zastron geval en hy het die beroep aangeneem. Op 2 Desember is hy en sy gesin hartlik in die gemeente verwelkom. Die gemeente het hom destyds beywer vir die oprigting van 'n kerkgebou op 'n terrein wat saam met die pastorie as geskenk van die moedergemeente ontvang is. Ruim bydraes is vir die oprigting van die kerk ontvang, en die kerk vroeg is in 1952 in gebruik geneem.