NG gemeente Kensington

Die NG gemeente Kensington is 'n gemeente van die Nederduitse Gereformeerde Kerk in die voorstad Malvern in die ooste van Johannesburg wat op 1 November 1992 ontstaan het vanweë die samesmelting van NG gemeente Jeppestown (waarby die NG gemeente Bezuidenhoutsvallei in 1980 reeds ingelyf is) en NG gemeente Malvern (waarby die NG gemeente Belgravia ingelyf is, ook in 1980).

Die eertydse NG gemeente Malvern se kerk is in Augustus 1944 ingewy en het in 1992 die tuiste van die saamgestelde gemeente geword.

Die kerkperseel, 2017.

Dit was ná drastiese afname in die Afrikaanse bevolking van Johannesburg-Oos, wat ook sy tol geëis het op die skole in die omgewing sodat uiteindelik net 'n enkele Afrikaanse laerskool van die aanvanklike drie oorgebly het, die Laerskool Kensington, wat ontstaan het uit die samesmelting van die laerskole Kensington, Johan Rissik en Malvern,[1] met ingang 1992. Leon van Eeden, wat die voorafgaande drie jaar die hoof van die Laerskool Malvern was, was die nuwe hoof van die saamgesmelte skool en is in 1994 oorlede. Herman van der Schyff is toe aangestel as hoof en die skool het onder sy leiding groot hoogtes bereik. Hy pleeg in 2006 selfmoord. Engels is geleidelik as onderrigmedium ingevoer van 2003 af en het omstreeks 2010 die enigste onderrigtaal geword. Die Hoërskool Kensington, ook 'n Afrikaansmediumskool, het al einde 1991 gesluit.[2] Sy terrein huis die Sekondêre Skool Kensington.