NG gemeente Berea

Die hoeksteen van die kerksaal is op 2 Augustus 1947 deur ds. F.N. van Niekerk gelê. Die kerkgebou se hoeksteen is ná verbouings nie meer sigbaar nie.

Ná die De Vos-skeuring het die kerkraad van die gemeente Durban besluit om die gemeente in meer gemeentes te verdeel ten einde die lidmate meer intensief te kan bearbei. So is dan op 18 Julie 1945 in die kerksaal, Smithstraat 151, 'n afstigtingsvergadering gehou onder die bekwame voorsitterskap van ds. M.W. Odendaal, bygestaan deur die Ringslede, di. J.S. Erlank, H.C.J. Flemming en J.J. Struwig. Twee gemeentes is toe afgestig, naamlik Port Natal en Berea.

Die naam Berea is voorgestel deur oudl. E.J. Muller en gesekondeer deur oudl. C.D. Viviers, en eenparig deur die vergadering aangeneem. Die ledetal is op sowat 970 vasgestel en as bruidskat het die gemeente die pastorie in Evansweg (Port Natal), gewaardeer vir £5 500, ontvang. Daar is toe ook besluit om gesamentlik met die moedergemeente die hoofdienste vir twee jaar nog in die moederkerk te hou. Binne die grense van die gemeente was geen geskikte saal of lokaal te kry nie. Ná 'n gesukkel is die pastorie in Evansweg verkoop en 'n pastorie in Windermereweg, Berea, gekoop. Die gemeente was gelukkig om in die begin die St. Mary-saal vir Sondagskooldoeleindes te huur, maar dit was nie lank nie of die eienaars het hulle die voorreg ontneem, met die gevolg dat die gemeente buitedienste, Strewers-vergaderinge, biduur en Sondagskool in die pastorie gehou moes word. Die Sondagskool moes maar klaarkom met 'n vertrek 16 x 16 vt.

Maar daar het uitkoms gekom met die aankoop van die pastorie wat jare lank nog in gebruik was, met 'n oop stuk grond langsaan waarop die kerksaal later sou staan. Gelukkig was die gemeente nie lank vakant nie. Ná twee vrugtelose beroepe, het ds. F.N. van Niekerk die beroep aangeneem en is hy in 1946 bevestig. Met toegewydheid het die jong leraar hom vir die oprigting van 'n plek van aanbidding beywer, en op 2 Augustus 1947 is die hoeksteen van die sierlike saal gelê wat in Desember 1947 ingewy is.

In Julie 1948 het ds. Van Niekerk die gemeente verlaat en op 9 Oktober 1948 is ds. J. Adler as leraar van die gemeente bevestig. Hy kon deur die genade van die Here die werk met seën voortsit, aldus Ons gemeentelike feesalbum, en met behulp van 'n flukse kerkraad die skuld van £5 000 afbring tot £1 800. Dieselfde kerklike album het in 1952 berig: "Berea is vandag 'n bloeiende gemeente met 'n skitterende toekoms."

Op 15 Maart 1992 het Berea met Natal en Glenwood saamgesmelt weens die afname in NG lidmate in Durban, maar in 1997 het Berea opnuut afgestig. Die kerkgebou op die hoek van Floridaweg en 7de Laan, Morningside, is later verkoop, waarna die gemeente vir eredienste byeengekom het in die Tuinsig-sentrum, Problem Mkhizeweg 12, Morningside, Durban.

• Francois Nicolaas van Niekerk, 1946 tot 1948
• John Adler, 1948 tot 1968

In 1960 het die Ring van Durban bestaan uit 13 gemeentes met 8 322 belydende lidmate, maar die gemeente Weza-Port Shepstone het later 'n afsonderlike ring geword sodat die 12 oorblywende gemeentes 7 698 belydende lidmate gehad het. In 1985 was daar twee Durbanse ringe, te wete Durban en Durban-Suid. In die gesamentlike getal van 20 gemeentes was daar toe 12 464 belydende lidmate. In 2000 het daar 19 gemeentes oorgebly met 10 241 belydende lidmate, maar die getal gemeentes het teen 2015 afgeneem tot 14 en die belydende lidmate tot 6 600.

• (af) Olivier, ds. P.L., Ons gemeentelike feesalbum. Kaapstad en Pretoria: N.G. Kerk-uitgewers, 1952.

• Die gemeente se destydse kerkgebou op die hoek van Floridaweg en 7de laan, Morningside, Durban, soos te sien op Google Maps. URL besoek op 18 Julie 2015.