NG gemeente Balfour

Die NG gemeente Balfour is ’n gemeente van die Nederduitse Gereformeerde Kerk op die dorp Balfour in Mpumalanga, sowat 50 myl (in die ou taal) oos van Johannesburg aan die spoorlyn na Durban en die N3 nasionale pad. Dis geleë tussen die dorpe Heidelberg, Gauteng, en Greylingstad in landelike en vooruitstrewende gemeenskap, tipies hoëveld en omring deur rante en goed beboude plase. Die gemeente ressorteer onder kerk se Sinode Hoëveld.

Die NG kerk Balfour. Ds. C.W. de Wet het die hoeksteen op 10 Junie 1953 gelê. Die argitek was Hendrik Vermooten. Die bouaannemer was C. Korsten, die sanger Gé Korsten se pa.
Ds. C.W. de Wet.
Ds. D.J. Streicher, leraar van 1940 tot 1948.

Stigting

Oorspronklik was Balfour 'n deel van die gemeente Heidelberg, maar met die afstigting van Greylingstad in 1909 het dit onder laasgenoemde geressorteer totdat dit in die donker oorlogsjare in 1940 tot 'n selfstandige gemeente afgestig is. In geloofsvertroue het die ongeveer 700 lidmate die pionierswerk begin.

Onder die toegewyde leiding van ds. P.J. Swart het die moedergemeente 'n sierlike kerksaal met 'n ruim kerkplein as geskenk aan die dogtergemeente oorhandig. Omstreeks 1950 is 'n nuwe kerkorrel aangekoop en is 'n nuwe pastorie, wat £7 000 gekos het, ingewy. Intussen het die gemeente tot 815 lidmate aangegroei.

Ná die voltooiing van die pastorie is geld vir die bou van 'n nuwe kerkgebou ingesamel. Vanaf die stigting (1940) was ds. D.J. Streicher (later van Christiana) die leraar, terwyl ds. C.W. de Wet (vroeër van Marquard) hom in Junie 1949 opgevolg het.

Bronne

Enkele leraars
  • David Johannes Streicher, 1940–1949
  • C.W. de Wet, Junie 1949 – ?
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.