Skikgodin

Die skikgodinne of Moirai (Grieks: Μοῖραι) was in die Griekse mitologie die witgeklede verpersoonlikings van die noodlot. Die Griekse woord μοῖρα ("moira") beteken letterlik " ’n deel", dus ’n mens se deel van die lewe of noodlot. Hulle het die figuurlike draad van elke sterflike se lewe beheer van geboorte tot die dood (en daarna).

Volgens H.J. Rose was Nyx ("Nag") die moeder van die skikgodinne.[1]

Daar was gewoonlik drie van hulle:

  • Clotho (Κλωθώ; "wewer"), wat die draad van die lewe geweef het.
  • Lachesis (Λάχεσις; "toekenner" of trekker van lootjies), wat die draad van elke mens se lewe gemeet het met haar maatstok.
  • Atropos (Ἄτροπος; "onvermydelik" of letterlik "onomkeerbaar"), wat die lewensdraad gesny het. Sy het gekies hoe elke mens sterf.

Mite

Die skikgodinne sou drie nagte ná ’n kind se geboorte verskyn om die verloop van sy lewe te bepaal. Volgens die Grieke was hulle die dogters van Zeus en Themis of van oerwesens soos Nyx ("Nag"), Chaos of Ananke ("Noodsaaklikheid").

Die skikgodinne is gewoonlik uitgebeeld as koue, hardvogtige en ongevoelige ou vroue. Desondanks is hulle as gode aanbid. Bruide in Athene het dikwels haarlokke aan hulle geoffer.

Verwysings
  1. Rose, H.J., Handbook of Greek Mythology, bl. 24

Bronne
  • Graves, Robert, Greek Myths
  • Harrison, Jane Ellen, Prolegomena to the Study of Greek Religion 1903. Hoofstuk VI, "The Maiden-Trinities"
  • Kerenyi, Karl, 1951. The Gods of the Greeks (Thames and Hudson)
  • Ruck, Carl, en Staples, Danny, The World of Classical Myth, 1994.

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.