Millenniumbrug

Die Millenniumbrug is 'n voetgangersbrug in Londen in die Verenigde Koninkryk. Hierdie hangbrug, waarvan die platform 13 voet wyd is, is van staal vervaardig en hang tussen die Southwark-brug (stroomaf) en die Blackfriars-brug (stroomop) oor die Teems-rivier. Dit verbind Bankside met die City of London.

Die Millenniumbrug in Londen

Die uitsig vanaf die brug oor die Teems se suidoewer, London Bridge en die wolkekrabber The Shard

Millenniumbrug in die aandskemer

Die brug is deur 'n kreatiewe span, bestaande uit Norman Foster se ateljee Foster + Partners, die beeldhouer Anthony Caro en die ingenieursonderneming Arup, ontwerp. Dit is op 10 Junie 2000 geopen en is tans die nuutste brug oor die Teems. Dit is die eerste brug wat oor die Teems gebou is sedert die Tower-brug in 1894 voltooi is. Die brug is die eiendom van Bridge House Estates, en word ook deur hulle onderhou.

Op die openingsdag het 90 000 mense die brug oorgesteek, met tot 2 000 mense wat op 'n slag op die brug was. Drie dae na die opening is die brug as gevolg van laterale vibrasies gesluit. Sewe-en-dertig skokbrekers is aangebring waarna die brug weer in Februarie 2002 heropen is.

Die suidelike punt van die brug is naby Globe Theatre, die Bankside Gallery en Tate Modern. Die noordelike end van die brug eindig by die City of London School onder die St. Paulus se katedraal. Die laagliggende konstruksie verseker dat die brug 'n panoramiese uitsig oor St. Paulus se katedraal, die Teems en die stadsilhoeët van Sentraal-Londen bied.[1]

• 
  Die Millenniumbrug, soos vanaf St. Paulus se katedraal gesien
• 
  Skokbrekers onder die brug
• 
  Onderkant van die brug