Mieliepap

Mieliepap is 'n eg Suid-Afrikaanse gereg wat van growwe mieliemeel en water gemaak word. Afrikaners in die noorde van die land eet dit gewoonlik vir ontbyt saam met melk en suiker, of as bygereg tydens ander etes. Dit is veral gesog as bygereg saam met braaivleis en word met 'n pikante sous soos tamatie en uie (braaismoor), tjakalaka of kaas en sampioene bedien.

Mieliepap (bo) met braaismoor as bygereg.

Mieliepap word hoofsaaklik deur die inheemse swart bevolking en die Afrikaners genuttig, en nie soseer deur dié van Engelse of Asiatiese afkoms nie.

In die Kaapprovinsies word dit byna uitsluitlik vir ontbyt geëet.

Aangesien mieliemeel redelik goedkoop is, word pap deur behoeftige mense as stapelvoedsel gebruik, en met groente, sous of 'n vetjie genuttig.

Resep

Die bestanddele is 2 koppies water en een teelepel sout vir elke 1 koppie mieliemeel. Die water moet eers goed kook alvorens die mieliemeel ingegooi word. Roer af-en-toe (elke 15 minute) tot gaar. Die geheim is om dit vir minstens 30 minute stadig te laat stoom oor lae hitte, sonder om te veel aan te brand. Vir ekstra geur kan botter of ingelegde heel mieliepitte ook bygevoeg word.

Vorme
  • Stywepap (mees algemeen)
  • Slappap (vir ontbyt)
  • Krummelpap of poetoepap gewoonlik met braaivleis
  • Paptert, gemaak van mieliepap met 'n spek-, kaas- en groentevulsel, gewoonlik met braaivleis.[1]

Sien ook
  • Polenta, 'n Noord-Italiaanse variant van mieliepap

Verwysings
  1. Delicious paptert recipe for your Heritage Day braai Geargiveer 10 Julie 2019 op Wayback Machine Zululand Observer, 23 September 2018. Besoek op 10 Julie 2019.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.