Michael Zondi
Michael Zondi (1926–2008) was 'n Suid-Afrikaanse beeldhouer. Hy is op 10 Maart 1926 in Greytown, Natal, gebore en het sy skoolopleiding aan verskeie Natalse skole ontvang. Hy het onder meer opleiding aan 'n ambagskool in Dundee ontvang, waar hy geleer het om houtwerk te doen en later het hy kwalifikasies in boukonstruksie en -ontwerp verwerf. In 1945 het hy met sy eie skrynwerkersonderneming op Edendale begin, waar hy met houtsneewerk begin eksperimenteer het.
| Michael Zondi | |
|---|---|
| Gebore | 10 Maart 1926 Greytown, Natal, Unie van Suid-Afrika |
| Sterf | 15 Maart 2008 (op 82) Pietermaritzburg, Suid-Afrika |
| Nasionaliteit |  Suid-Afrika |
| Veld | Beeldhoukuns |
Daarna het hy op Dundee gaan skoolhou, en op 26-jarige ouderdom het hy besluit om hom voltyds aan die beeldhoukuns te wy. Van 1967 tot 1971 was hy egter aan die destydse Departement van Inligting se afdeling vir gemeenskapsontwikkeling verbonde. Sedertdien het hy hom weer voltyds aan die beeldhoukuns gewy. Michael Zondi het in stinkhout, olienhout en imbuia gewerk, en hy het al talle uitstallings in Suid-Afrika sowel as in die buiteland gehou. In 1961 het hy 'n medalje op die Republiekdag-kunsuitstalling ontvang en in 1966 het hy Suid-Afrika by die Venesiaanse Biënnale verteenwoordig. Hy is op 15 Maart 2008 in Pietermaritzburg, KwaZulu-Natal, Suid-Afrika, oorlede.
