Michael II van Bisantium

Michael II (Grieks: Μιχαήλ Β'; 770 – 2 Oktober 829) was die Bisantynse keiser van Desember 820 tot met sy dood op 2 Oktober 829. Hy was ook bekend as Michael die Amoriaan of die Hakkelaar, en was die eerste keiser van die Amoriaanse of Frigiese Dinastie.

Michael II
Keiser van die Bisantynse Ryk
’n Muntstuk wat Michael II en sy seun, Theophilus, uitbeeld.
Bewind	25 Desember 820 – 2 Oktober 829
Dinastie	Frigiese
Gebore	770
Oorlede	2 Oktober 829
Voorganger	Leo V
Opvolger	Theophilus
Eggenote	Thekla Euphrosine
Kinders	Theophilus

Michael het vinnig opgang gemaak in die leër danksy die keiser, sy eertydse kollega Leo die Armeen. Hy het egter in 820 die sluipmoord op Leo beplan en sy bewind oorgeneem. Hy moes dadelik aandag skenk aan die opstand deur ’n ander generaal, Thomas die Slawiër, wat hom amper sy kroon gekos en tot die lente van 824 geduur het.

In die later jare van Michael se bewind het hy twee militêre nederlae gely met langtermyngevolge. Hy het ook die begin van die Moslemse verowering van Sisilië en die val van Kreta onder die Sarasene beleef.

Hy het by sy eerste vrou, Thekla, ’n seun, Theophilus, gehad. Sy is omstreeks 823 dood en hierna het Michael met Euphrosine, ’n dogter van Konstantyn VI, getrou. Dit was moontlik bedoel om sy posisie as keiser te versterk, maar het teenstand van die kerk uitgelok omdat Euphrosine ’n non was. Michael II is op 2 Oktober 829 dood. Hy is deur Theophilus opgevolg.