MiG-31

Die MiG-31 is 'n Russiese vegvliegtuig wat ontwikkel is vanaf die MiG-25 en het die Toepolef Tu-28 vervang as die hoof-langstrekonderskepper.

MiG-31 "Foxhound"
'n MiG-31B van die Russiese Lugmag in vlug, 2011
Tipe	Onderskepper/vegter
Vervaardiger	Mikojan
Ontwerp deur	Mikojan
Nooiensvlug	16 September 1975
Bekendstelling	6 Mei 1981
Status	In gebruik
Hoofgebruikers	Russiese Lugmag Kasakstanse Lugmag
Vervaardig	1975 tot 1994
Aantal gebou	519
Ontwikkel van	MiG-25

In verslae van die Noord-Atlantiese Verdragsorganisasie (NAVO) word na die MiG-31 as Foxhound verwys.

Ontwikkeling van die vliegtuig het in 1970 begin en die prototipe, Ye-155MO, het sy nooiensvlug in 1975 voltooi. Die eerste van 300 eenhede is vanaf 1979 aan die Russiese Lugmag gelewer. Alhoewel die MiG-31 deur die MiG-25 geïnspireer is, was dit 'n nuwe alleweerstoestand-, allehoogte-vliegtuig waarvan die raamwerk gebou is van nikkelstaal, ligte allooie en titanium. Dit was nodig om te verseker die vliegtuig voldoen aan die hoë werkverrigtingomgewing waaraan dit moes vlieg.

Dit was toegerus met gesofistikeerde Flash Dance-radar. Dit is in daardie stadium beskou as die kragtigste radar in 'n vegvliegtuig, dit kon 200 km vorentoe sien, asook agter en onder die vliegtuig. Dit is beheer deur die tweede bemanningslid en kon tien teikens volg en vier tegelykertyd aanval nadat dit bepaal het watter teikens die grootste bedreiging is.

Latere modelle is van 'n invlughervullingsgerief voorsien wat hulle togafstand verbeter het. Ook kon die vliegtuie se databanke met mekaar kommunikeer sodat vliegtuie inligting oor teikens en taktiese situasies kon uitruil.