Mesosfeer
Die mesosfeer (van die Griekse mesos, "middel") is die derde laag van die Aarde se atmosfeer, reg bo die stratosfeer en reg onder die termosfeer. In die mesosfeer neem temperatuur af namate hoogte toeneem. Dié eienskap word gebruik om sy grense te bepaal: Dit begin bo die stratosfeer (soms die stratopouse genoem), en eindig by die mesopouse, wat die koudste deel van die Aarde se atmosfeer is, met temperature onder -143 °C.
Die presiese boonste en onderste grense van die mesosfeer wissel volgens die seisoen en plek (dis hoër in die winter en by die trope, en laer in die somer en by die pole), maar die onderste grens is gewoonlik op ’n hoogte van 50 tot 65 km bo die Aarde se oppervlak en die boonste grens op ’n hoogte van 85 tot 100 km.[1][2][3][4]
Die term nabye ruimte word soms gebruik om na hoogtes binne die mesosfeer te verwys. Dié term het nie ’n tegniese definisie nie, maar verwys gewoonlik na die streek van die atmosfeer tot by 100 km, rofweg tussen die Armstrong-grens (waarbo ’n mens ’n ruimtepak nodig het om te oorleef) en die Kármán-lyn (waar astrodinamika moet oorneem van aërodinamika vir ’n ruimtevlug). Nog ’n definisie is dat dit die hoogte is bo dié waar vliegtuie vlieg, maar onder die hoogte waar satelliete om die Aarde wentel.
Verwysings
- "Middle atmosphere". www.antarctica.gov.au (in Australian English). Geargiveer vanaf die oorspronklike op 21 Maart 2020. Besoek op 17 Junie 2018.
- Venkat Ratnam, M.; Patra, A. K.; Krishna Murthy, B. V. (25 Maart 2010). "Tropical mesopause: Is it always close to 100 km?". Journal of Geophysical Research (in Engels). 115 (D6). doi:10.1029/2009jd012531. ISSN 0148-0227.
- "The Mesosphere - overview | UCAR Center for Science Education". scied.ucar.edu (in Engels). Besoek op 17 Junie 2018.
- von Zahn, U.; Höffner, J.; Eska, V.; Alpers, M. (1 November 1996). "The mesopause altitude: Only two distinctive levels worldwide?". Geophysical Research Letters (in Engels). 23 (22): 3231–3234. doi:10.1029/96gl03041. ISSN 0094-8276.
