Menton

Danksy die ligging met die See-Alpe se uitlopers in die agterland geniet die stad 'n baie milde klimaat met warm somers. Menton is ook gedurende die winter die warmste vakansieoord van die Côte d'Azur, met baie min dae waar die temperature tot by die vriespunt daal. Die stad is reeds in die 19de eeu 'n gewilde vakansieoord vir welgestelde Engelse toeriste, wat die winter op hul eiland wil ontvlug.

Die ou stadskern van Menton

Die naam Menton is afgelei van Mont d'Othon. In die Romeinse tydperk word die baai van Menton Pacis Sinus genoem (Vreedsame Baai).

Tot by die jaar 1157 is Menton 'n besitting van die grawe van Ventimiglia. Daarna staan dit eers onder die heerskappy van die adellike gesin Vento uit Genua en later - saam met Roquebrune - van die vorstehuis Grimaldi uit Monaco. Na 'n opstand teen die Monegaskiese bewind en sy belastingswette verklaar die burgers die gebied tot 'n onafhanklike republiek; vervolgens verkoop die vorstehuis Menton en Roquebrun aan die Franse keiser Napoléon III.

In 'n referendum stem die burgers in 1861 vir die inlywing by Frankryk. Die ekonomiese opbloei van die gebied begin teen die einde van die 19de eeu, toe die heilsame klimaat vir tuberkulose-pasiënte aanbeveel word. Sedert 1884 verbind 'n spoorweg die stad met die res van Frankryk. Tydens die Eerste Wêreldoorlog bly baie gewonde soldate in die stad.

Na die Franse oorgawe tydens die Tweede Wêreldoorlog beset Italiaanse troepe die stad en word eers in 1944 na hewige gevegte weer verdryf.

Aangesien Noord-Italië nou die welvarendste streek van die Europese Unie geword het, kan baie Italiaanse burgers vandag 'n villa of woonstel in Menton bekostig.

Die toerisme en dienstesektor vorm die ekonomiese basis van Menton. Baie burgers het 'n werkgeleentheid in Nice of Monaco gevind, terwyl die boubedryf deur Italiaanse ondernemings oorheers word.

Die landbou, wat in die 19de eeu veral op suurlemoene steun, is nou minder belangrik. Suurlemoenkonfyt uit Menton is egter nog steeds 'n gewilde soewenier. Die suurlemoene en lemoene, wat as dekorasie vir die jaarlikse "Suurlemoenfees" benodig word, is invoere uit Spanje.

Die ou stadskern met sy pastelkleurige fasades het nog steeds 'n Italiaanse voorkoms. Menton beskik oor 'n groot aantal parke en tuine met subtropiese plantspesies, veral in die voorstad Gavan.

Kerke

• Die katedraal Saint-Michel van 1675 bekoor met sy barok-boustyl. Die mosaiek voor die kerk vertoon die wapen van die Grimaldi-gesin, wat eeue lank oor die stad heers.
• Die Kapusynklooster L'Annonciade dateer uit die 18de eeu en dien as 'n uitkykplek.

Wikimedia Commons bevat media in verband met Menton.