Menelik I

Menelik I (Ge'ez: ምኒልክ Mənilək) was die eerste keiser van Ethiopië van die Salomoniese Dinastie. Volgens die Kebra Nagast, ’n 14de-eeuse geskrif, het hy in die 10de eeu v.C. Ethiopië se Huis van Salomo gestig – dit is so genoem omdat Menelik glo die seun was van die Bybelse koning Salomo en Makeda, die Ethiopiese koningin van Skeba.[1][2]

Menelik I
Keiser van Ethiopië
Dinastie Huis van Salomo
Bewind 10de eeu v.C.
Voorganger Geen
Vader Koning Salomo
Moeder Koningin van Skeba

Lewe

Volgens die Middeleeuse Kebra Nagast, wat in 1312 in Ge'ez vertaal is,[3] [4][5] was sy naam Bäynä Ləḥkəm (van Arabies ابن الحكيم, "seun van die wyse man"). Die naam "Menelik" is Amharies, ’n Ethiopiese taal.

Volgens legende is Menelik verwek nadat Salomo die koningin van Skeba verlei het. Sy ma het hom as ’n Jood in Ethiopië grootgemaak en hy was in sy 20's toe hy Jerusalem die eerste keer besoek het om sy pa te ontmoet. Sy pa het Menelik gesmeek om te bly en oor Israel te regeer, maar Menelik wou na Ethiopië terugkeer. Salomo het toe baie Israeliete saam met hom gestuur om hom te help om volgens Bybelse standaarde te regeer en hulle het die Verbondsark met hulle saamgeneem. (Volgens sommige weergawes het hulle dit gesteel en volgens ander het Salomo dit vir hulle gegee.) Ná die dood van sy ma het Menelik toe koning van Ethiopië geword.

Dinastie

Die legende lui dat Menelik I die Salomoniese Dinastie van Ethiopië gestig het en dat hulle, met ’n paar onderbrekings, byna 3 000 jaar aan die bewind was. Dit het 225 geslagte later geëindig met die afsetting van keiser Haile Selassie in 1974. Historiese rekords wys egter die Salomoniese Dinastie het in 1262 n.C. begin toe Jekoeno Amlak, wat beweer het hy stam af van die konings van Aksoem, Salomo en die koningin van Skeba, die laaste heerser van die Zagwe-dinastie omvergewerp het. Volgens hom was hulle "nie van die Huis van Israel" (dus van Salomo) nie. Tot vandag is daar geen bewyse dat die mense van die Ethiopiese Hoogland Jode was voor die 4de eeu n.C. nie.[6]

Kuns

’n Kunswerk in Ethiopië vertel die verhaal van Menelik I in ’n reeks panele.[7][8] Die storie wat daarop uitgebeeld word, is nie die Middeleeuse teksweergawe nie, maar die mondelinge weergawe (wat begin met ’n agtergrondstorie oor Skeba en ’n deel insluit oor ’n Ethiopiese diensmeisie wat ook swanger raak by Salomo).

Verwysings
  1. Marrassini, Paolo. 2007. "Kəbrä Nägäśt." In Encyclopaedia Aethiopica: He-N: Vol. 3, red. Siegbert Uhlig, 364-368. Wiesbaden: Harrassowitz.
  2. Fiaccadori, Gianfranco. 2007. "Mənilək I." In Encyclopaedia Aethiopica: He-N: Vol. 3, red. Siegbert Uhlig, 921-922. Wiesbaden: Harrassowitz.
  3. Bezold, Carl. 1905. Kibra negest , die Kerrlichkeit der Könige: Nach den Handschriften in Berlin, London, Oxford und Paris. München: K.B. Akademie der Wissenschaften.
  4. Anonymous. 1932. The Queen of Sheba and Her Only son Menyelek ... A Complete Translation of the Kebra Nagast. Translated by E. A. Wallis Budge. 2nd ed. London: Oxford University Press.
  5. Hubbard, David Allan. 1957. "The Literary Sources of the Kebra Nagast."PhD diss, University of St. Andrews.
  6. Ullendorff, Edward. 1956. "Hebraic-Jewish Elements in Abyssinian (monophysite) Christianity." Journal of Semitic Studies 1 (3):216-256.
  7. "The Story of the Queen of Sheba". www.metmuseum.org. Besoek op 6 Januarie 2020.
  8. Biasio, Elisabeth (2009). "Contemporary Ethiopian Painting in Traditional Style: From Church-Based to Tourist Art". African Arts. 42 (1): 14–25. doi:10.1162/afar.2009.42.1.14. ISSN 0001-9933. JSTOR 20447932.

Skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.