Memnon

Memnon (Grieks: Μέμνων) was in die Griekse mitologie ’n Ethiopiese koning en die seun van Titonos en Eos. As ’n vegter was hy amper in Achilles se klas. Tydens die Trojaanse Oorlog het hy ’n leër na Troje gebring en Antilochos in ’n woeste geveg doodgemaak. Die dood van Memnon is soortgelyk aan dié van Hektor, nog ’n verdediger van Troje wat Achilles doodgemaak het uit wraak vir die moord op Patroklos.

Memnon se vertrek na Troje, omstreeks 550-525 v.C. (Koninklike Museum van Kuns en Geskiedenis, Brussel, België).

Ná Memnon se dood is Zeus geraak deur Eos se trane en het hy hom onsterflik gemaak. Memnon word in besonderhede gedek in die verlore epiese gedig Aitiopis, wat ná die Ilias geskryf is, omstreeks die 7de eeu v.C. Quintus van Smirna beskryf Memnon se dood in Posthomerika en Philostratos in Beelde.

Dictys Cretensis, ’n Griekse vegter in die Trojaanse Oorlog en die skrywer van ’n skynkroniek oor die oorlog, skryf: "Memnon, die seun van Titonos en Aurora, het gearriveer met ’n groot leër van Indiane en Ethiopiërs, ’n werklik merkwaardige leër wat bestaan het uit duisende en duisende manne met verskeie soorte wapens, en het die hoop en gebede van selfs Priamos oortref."[1][2]

Memnon in Posthomerika
Geveg tussen Achilles (links) en Memnon. Suid-Italië, 330 v.C.

Memnon het van die westelike oseaan gereis met sy leër Ethiopiërs, wat so groot was dat hulle nie getel kon word nie, en ’n banket is ter ere van hom gehou. Daar het Memnon en Priamos oorlogstories uitgeruil en Memnon se verhale het daartoe gelei dat Priamos verklaar het die Ethiopiese koning sou Troje red.

Memnon was so gewild dat Zeus die ander gode laat belowe het hulle sou nie in die volgende dag se gevegte inmeng nie. Memnon het Nestor se seun, Antilochos, doodgemaak nadat Antilochos Memnon se geliefde kameraad Aisop doodgemaak het. Nestor wou uit wraak teen Memnon veg, maar dié het geweier om teen so ’n ou man te veg.

Nestor het by Achilles gepeit om teen Nestor te veg en Antilochos se dood te wreek. Die twee mans het gebots, terwyl albei goddelike wapenrusting gedra het wat deur Hefaistos gemaak is. Zeus was ten gunste van albei en het gemaak dat hulle nie moeg word nie, sodat die hele slagveld kon kyk hoe hulle as halfgode baklei. Eindelik het Achilles Memnon deur die hart gesteek en dit het gemaak dat die hele leër vlug.

Ter ere van Memnon het die gode al sy druppels bloed versamel en ’n groot rivier daarvan gemaak sodat die rivier elke jaar met die herdenking van Memnon se dood die reuk van menslike vlees sou hê.[3] Die Ethiopiërs wat gebly het om hulle leier te begrawe is in voëls verander (wat nou die "Memnonides" genoem word).[4] Hulle het by sy graftombe gebly om stof wat daarop versamel te verwyder.[5]

Verwysings
  1. Dictys Cretensis, Trojan War Chronicle, 4.4
  2. Dictys Cretensis Book 4, vertaal deur R.M. Frazer
  3. Quintus & James 2004
  4. Die redakteurs van Encyclopaedia Britannica. "Memnon". Encyclopaedia Britannica. Besoek op 23 November 2018.
  5. Quintus & James 2004

Skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.