Mebos
Mebos is ‘n tradisionele Suid-Afrikaanse lekkergoed gemaak van appelkose. Dit is soet van buite en het ‘n sout en suur smaak van binne.
Bereiding
Elke plaas in die Boland het sy eie unieke resep gehad om hierdie kultuurproduk te berei. Dit word gemaak van sagte appelkose wat baie goed ryp is. Hulle word gewoonlik oornag in gekonsentreerde pekelwater gelaat. Die skil van die appelkoos raak dan los en afgetrek. Daarna word die appelkose goed met swawel ingesmeer en vir ‘n oggend in die son laat droog word. Na ‘n paar dae word die pitte verwyder en die appelkose weer met swawel bewerk. Gewoonlik word twee of meer appelkose saamgepers om die gewenste vorm te kry. Dan word dit op stellasies in die son geplaas om te droog en word dit ‘n paar maal gedruk om ‘n plat en ronde vorm te kry. Die droë vrugte word laastens in kalk- of pekelwater afgewas, afgedroog en met suiker ingesmeer. As meboskonfyt gemaak word, word die mebos in ‘n fles geplaas met ‘n stroop en kalkwater of suiker en water.
Liedjie
In die tradisionele Afrikaanse volksliedjie “Daar kom Tant Alie” kom die volgende twee sinne voor:
En tant Mina kook stroop van die meboskonfyt, van die Wellingtonse suiker teen die trippens die pond.
Geskiedenis
Die oorsprong van mebos kan teruggevoer word na Nederlands-Oos-Indië. Tydens die VOC se bewind was dit in Suid-Afrika reeds bekend en die Hugenote het dit ook berei. Die woord mebos kom van die Japans umeboshi, “ingemaakte pruime” of die Arabies mushmush, “appelkoos”.
Bibliografie
- Green, Lawrence G.: Beyond the city lights. The story of the Western Province – the towns and the farms, the life and the people, the folklore and the legends. Kaapstad: Howard Timmins, 1957.