Maria Steyn

Maria Steyn (Steynsburg, Kaapkolonie, 24 Mei 1886 – onbekend) was ’n vroueleier in die Gereformeerde Kerke in Suid-Afrika, in haar eie gemeente, Colesberg, sowel as nasionaal.

Suster Maria Steyn.

Maria Steyn was die oudste dogter van J.N. Labuschagne en sy eggenote van Steynsburg. In 1916 is sy getroud met Izak Steyn van Colesberg. Die stigting van ’n Gereformeerde Vrouevereniging op Colesberg is lank druk bespreek tot Francina van der Walt besluit het om die voortou te neem en die susters van die Gereformeerde gemeente byeen te roep. Op 26 Februarie 1916 was ’n groot getal susters teenwoordig en so is besluit om die eerste vereniging te stig, die Gereformeerde Sustershulpvereniging (GSHV), wat dit ten doel gehad het om die Gereformeerde kerk van Colesberg te steun.

Van die begin af het Maria Steyn aktief deelgeneem aan die GSHV van Colesberg. Met die gemeente se eeufeesviering in 1960, 46 jaar later, kon sy nie meer die stigting van die vereniging onthou nie, maar wel dat sy ywerig gewerk het vir die eerste verkoping, wat 'n reuse sukses was. Sy kon ook goed onthou hoe hard die susters gewerk het vir die orrel wat in Januarie 1922 geïnstalleer is. Heel gou is sy gekies in die bestuur van die GSHV. In Mei 1930 is sy gekies as voorsitster en van toe toe minstens die eeufeesviering in1960 het sy ononderbroke as voorsitster of visevoorsitster opgetree.

In Junie 1936 het Colesberg se susters besluit om by die Gereformeerde Sustersbond (GSB), wat toe gestig is, aan te sluit. Maria Steyn is tot die hoofbestuur van Kaapland verkies en het jare lank as visevoorsitster van die GSB van Kaapland gedien, tot sy moes bedank weens haar ouers se siekte. In 1957 het sy in samewerking met 'n ouderling en die orrelis 'n bedrag van by die £2 000 ingesamel. Daarmee is 'n nuwe preekstoel en nuwe banke in die kerk gesit. Hoewel haar gesondheid met tye nie goed was nie, was sy dekades lank nooit afwesig by die vergaderings nie en was sy altyd hulpvaardig en pligsgetrou.

In die gemeente Colesberg se eeufeesgedenk boek het suster Magdalena Venter van Maria Steyn geskryf: "Tant Maria met haar mooi sagte geaardheid is vir ons almal 'n inspirasie en voorbeeld in die Vereniging. Sy is vriendelik in haar omgang en kalm maar beslis in haar optrede. Sy is 'n baie bekwame en taktvolle leidster asook 'n baie knap organiseerster, waar sy dan ook altyd haar deel ruim bydra. Haar deursettingsvermoë is te bewonder. Geen taak is vir haar te groot om aan te pak vir haar kerk en organisasie nie."