Louisville, Kentucky

Louisville (ˈluːiːvɪl, ˈluːəvəl of ˈlʊvəl) is die grootste stad in die Amerikaanse deelstaat Kentucky en die administratiewe setel van Jefferson County. Die stadsgrens stem sedert 2003 met dié van die county ooreen nadat die twee administratiewe eenhede tot 'n sogenaamde gekonsolideerde stad-county (consolidated city-county) saamgesmelt het. Louisville is net suid van die grens met die deelstaat Indiana oorkant die Ohiorivier geleë. Die bevolking was 741 096 volgens die sensus van 2010.

Louisville
Kaart	Wapen
	Vlag
Land	Verenigde State
Deelstaat	Kentucky
Koördinate	38°15′N 85°45′W
Gestig in	1778 (Corn Island)
Geïnkorporeer in	1780
Oppervlakte:
- Totaal	1 032 vk km
- waarvan land	997,38 vk km
Hoogte bo seevlak	142 m
Bevolking:
- Totaal (sensus 2010)	741 096
- Bevolkingsdigtheid	720,6/vk km
- Metropolitaanse gebied	1 307 647
Tydsone	EST (UTC -5) Somertyd: EDT (UTC -4)
Klimaat
- Tipe	Subtropiese klimaat
- Gemiddelde jaarlikse temperatuur	13,8 °C
- Gem. temp. Januarie/Julie	0,6 / 25,8 °C
- Gemiddelde jaarlikse neerslae	1130 mm
Burgemeester	Craig Greenberg (D)
Amptelike Webwerf	louisvilleky.gov

Die Ohiorivier was vanaf die stad se stigting die lewensaar van Louisville - behalwe vir sy natuurskoon het dit steeds 'n beslissende rol gespeel vir Louisville se vervoer, handel, kultuur en ontspanning. Die eerste stoomboot het in 1815 in Louisville aangedoen

Die stad, wat ter ere van koning Lodewyk XVI van Frankryk Louisville genoem is, is in 1778 deur George Rogers Clark (1752–1818), 'n grenspionier en militaris in die Amerikaanse Rewolusionêre Oorlog, gestig as een van die vroegste nedersettings wes van die Appalache-bergreeks. Louisville het in die 19de eeu tot 'n belangrike binnelandse hawestad gegroei en is vandag 'n kosmopolitiese nywerheidstad. Die stad word veral verbind met bourbon whiskey (sowat 'n derde van die totale Amerikaanse produksie word hier gedistilleer) en die Kentucky Derby-perdewedren wat jaarliks in Mei plaasvind en 'n halfmiljoen geesdriftige besoekers lok.[1]

Die Presbiteriaanse Kerk van die Verenigde State het sy hoofkwartier in Louisville.