Louise Smit

Smit het aan die onderwyskollege in die Paarl gestudeer, asook drama aan die Universiteit Stellenbosch se Akademie van Drama en Kuns. Sy het daarna liefdadigheidswerk in Malawi gedoen en volksverhale opgevoer met die deelname van plaaslike kinders in die landelike gebiede. Dit het gelei tot weeklikse kinderradioprogramme in Chichewa.[1]

Met haar terugkeer na Suid-Afrika het sy as 'n poppespeler by die Stadskouburg in Johannesburg aangesluit voordat sy 'n pos as programregisseur en -skepper by die SAUK se TV-afdeling aanvaar het. Haar eerste programme, Haas Das se Nuuskas en Wielie Walie, was nasionale treffers. Smit is die alleenskepper van Wielie Walie, soos bevestig is deur Fil Heckroodt, 'n prokureur by die SAUK (sy het die eerste 200 programme geskryf) asook Haas Das se Nuuskas (sy het 150 episodes geskryf), Pumpkin Patch (500 episodes), Kideo (1 000 episodes) en Mina Moo (150 episodes). Sy het altesaam 6 000 programme in 7 tale geproduseer; en volgens navorsing het sy die meeste karakters ter wêreld geskep. Smit is 'n bekende skrywer en het tot op datum 25 boeke gepubliseer. Sy het ook programme geskep in Zoeloe, Xhosa, Sesotho, Noord-Sotho, Tswana en Engels.[1] Sy is die regisseur van Liewe Heksie (die eerste 26 episodes) wat deur Verna Vels geskep is. Al die populêre en geliefde karakters wat deur Smit geskep is, is onder haar naam geregistreer. Sy het ook met vier van haar kinderproduksies deur Suid-Afrika getoer, te wete Haas Das se Nuuskas, Wielie Wielie Walie, Wielie Walie Boogie Boing-Boing en Prof. Fossi.

In 1980 het sy haar eie televisieateljee, Kinnor Studios, gebou. Red Pepper het dit in 1998 by haar gekoop.

Sy woon in Seepunt. Haar dogter, Corneli Smit, is 'n klassieke pianis in Europa.[2]

• Haas Das se Nuuskas — met Haas Das, Piet Muis, Koning Leeu, ens. (in Afrikaans).[1]
• Pumpkin Patch — Woofles die waghond, die tweeling Speckles en Freckles ens. (in Engels). Die avonture van 'n gemeenskap in 'n klein dorpie.[1]
• Mina Moo & Co. — Mina Moo ('n oulike koei), Bac en Teria (die stoute outjies), King Mick, Micka ens. (in Afrikaans en Engels).[1]
• Professor Fossi en die Dinosourusse — 'n Duitse Paleontoloog besoek die Dinosourusse (in Afrikaans).[1]
• Kideo — Timothy Traddle ('n skilpad), Mnr. Chinwag ('n donkie). 'n Speelkamer-program (in Engels).[1]
• Wielie Walie — Karel Kraai, Sarel Seemonster, Bytjie, Bennie Boekwurm, Wagga Wagga Kwag, Meend die Eend (in Afrikaans). 'n Speelkamer-reeks.[3]

Die meeste van die programme word tans herontwikkel. Haas Das, in "Haas Das hou konsert" (2007) en Wielie Walie (2009) is sommige van die programme wat herontwikkel word. Die programme-Haas Das se Nuuskas, Wielie Wielie Walie, en Prof. Fossi en die Dinosourusse is landwyd opgevoer. Sien Enteractive Productions.

Smit het ook sommige episodes van Liewe Heksie en Casimir geskryf.

Baie van Louise Smit se boeke is gebaseer op die karakters van haar televisieprogramme.

• Die Bybel vir Kinders/ The Bible for Children (1982/2002)
• Professor Fossilus en die dinosourusse (2004), geïllustreer deur Marjorie van Heerden
• Haas Das se Nuuskas (2006), geïllustreer deur Fred Mouton
• Haas Das raak weg! (2007), geïllustreer deur Tanja Joubert
• Wielie Wielie Walie (2010), geïllustreer deur Sean Verster

Een van haar verhale het ook in "Stippe Stappe Stories" (1996) verskyn. Sy het ook "Die klein-klein boompie" geskryf.

• Louise Smit se webtuiste
• Enteractive Productions