Linlithgow-paleis

Die ruïnes van Linlithgow-paleis (Engels: Linlithgow Palace) is op die dorp Linlithgow in Skotland geleë, sowat 24 km wes van Edinburg. Die paleis was in die 15de en 16de eeu een van die hoofwonings van die monarge van Skotland. Nadat die land se konings in 1603 ook die monarge van Engeland geword het, is die paleis min gebruik en in 1746 is dit grootliks afgebrand. Dit is nou ’n toeriste-attraksie.

Die suidelike aansig van Linlithgow-paleis.
Die groot saal, of parlementshuis.

Geskiedenis

’n Koninklike herehuis het in die 12de eeu op die plek gestaan.[1] Dit is in die 14de eeu vervang deur ’n fort onder Engelse magte onder Eduard I.

In 1424 is die dorp Linlithgow gedeeltelik verwoes in ’n groot brand.[2] Koning Jakobus I het die paleis laat herbou.[3] Jakobus III en Jakobus IV het aansienlik laat aanbou. Jakobus V, wat in April 1512 in die paleis gebore is, het verder laat aanbou. Maria, koningin van die Skotte, is in Desember 1542 in die paleis gebore[4] en het tydens haar bewind soms daar oorgebly. Nadat Jakobus VI van Skotland in 1603 ook koning van Engeland geword het, is die paleis min gebruik omdat die hof Engeland toe geskuif het. Tussen 1618 en 1622 het James VI dit laat herbou nadat dit vervalle geraak het. Die enigste monarg wat egter daarna in Linlithgow gebly het, was Karel I, wat in 1633 ’n nag daar deurgebring het.

Die paleis het daarna weer vervalle geraak. In Januarie 1746 het die leër van George II se jongste seun, prins Willem, die grootste deel van die paleis afgebrand.

Die paleis word sedert die vroeë 19de eeu bewaar en is vandag vir die publiek oop.[5]

Verwysings
  1. "Linlithgow Palace: Property detail". Historic Scotland.
  2. "British Castle - Linlithgow Palace History". Geargiveer vanaf die oorspronklike op 1 September 2009. Besoek op 10 April 2015.
  3. "St Michael's Church Feature Page" (in Engels). Undiscovered Scotland. Geargiveer vanaf die oorspronklike op 23 Mei 2019. Besoek op 6 Augustus 2009.
  4. "Mary, Queen of Scots (r.1542-1567)". Die amptelike webtuiste van die Britse monargie
  5. "Free weekend". Historic Scotland.

Eksterne skakels

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.