Mahlamba Ndlopfu

Mahlamba Ndlopfu (voorheen Libertas) is die naam van die ampswoning van die President van Suid-Afrika in Bryntirion in Pretoria.

Buiteaansig van Mahlamba Ndlopfu in Pretoria

'n Skaalmodel van die huis omstreeks die tyd toe dit ontwerp is.

Dr. Hendrik Verwoerd neem sy vrou, Betsie, en 'n kleinkind af op sy verjaardag by Libertas.

In 1935 is 'n kompetisie uitgeskryf om 'n huis vir die Eerste Minister in die Kaaps-Hollandse boustyl te ontwerp. Dit sou gebou word op 'n stuk grond aan die noordelike helling van Meintjieskop wat deur burgemeester Tom Jenkins aan die staat verkoop is. Gerard Moerdijk se inskrywing was die wenner en die huis het een van Moerdijk se bekendste ontwerpe geword. Hy is bygestaan deur Henry Watson.

Genl. J.C. Smuts en sy vrou was die eerste bewoners. Mev. Issie Smuts het die huis genoem na die historiese Libertas op Stellenbosch. Die premierswoning is gemeubileer met 18de-eeuse meubels uit Engeland, Frankryk en Nederland.

Sedert 1984 is dit die presidentswoning. In 1995 is die naam verander na Mahlamba Ndlopfu, Tsonga vir “nuwe dagbreek”. Toe het ook 'n beskeie modernisering van die huis plaasgevind.

Die huis in Tom Jenkinsrylaan is op die hoogste punt van die Bryntirion-landgoed, omring deur mooi tuine en bied 'n wye blik oor die Magaliesberge. Die tuin is in 1994 tot 'n nasionale gedenkwaardigheid verklaar.