Leeubrug

Leeubrug is 'n brug in Kerkstraat, Pretoria oor die Apiesrivier naby waar Walkerspruit daarby aansluit. Die brug is deur Sytze Wierda, Staatsargitek en Ingenieur van die Zuid-Afrikaansche Republiek, ontwerp en JJ Kirkness het in Desember 1887 met bouwerk begin. Voor die oprig van die brug is die verbinding tussen Arcadia en die sentrale deel van die dorp Meintjiesdrift of Leeudrift genoem – blykbaar omdat die digte struike en riete in die omgewing 'n veilige lêplek vir leeus was. Die laaste leeu in die omgewing is in 1858 geskiet. Die eerste brug oor die rivier, Arcadiabrug, het weggespoel. Ook die brug wat vandag nog staan moes in 1894 versterk word nadat dit beskadig is in vloede in Februarie en Oktober 1890. Vier bronsleeus uit Skotland is deur Sammy Marks geskenk en op die hoeke van die brug aangebring.[1]

Leeubrug in Kerkstraat.

Die brug is op 31 Desember 1981 tot nasionale gedenkwaardigheid verklaar.

Fotogalery
  • Leeubrug in die nag.

Verwysings
  1. PJ Greyling, Pretoria en die Anglo-Boere Oorlog, 'n Gids, Protea Boekhuis, Pretoria, Suid-Afrika, 2000, p75
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.