Lalique

Lalique is 'n Franse glasmaatskappy wat in 1888 deur die bekende glasmaker en juwelier René Lalique gestig is. Lalique is veral bekend vir die vervaardiging van glaskuns, insluitend parfuumbottels, vase enmasjienkapsierings vir motors, gedurende die vroeë twintigste eeu. Na René Lalique se dood het die maatskappy gedurende die 1950's oorgeskakel na die vervaardiging van loodglas (kristal) artikels, onder leiding van René se seun, Marc Lalique. Sedert 2010 word Lalique deur die Switserse maatskappy Art and Fragrance besit.

René Lalique
Madagaskar-vaas, Lalique

Geskiedenis

René Lalique (1860-1945) het op 16-jarige ouderdom sy loopbaan as juweliersambagsleerling begin, en teen 1881 was hy 'n vryskutontwerper vir baie van die bekendste Paryse juweliers. In 1885 het hy sy eie werkswinkel by Place Gaillon in Parys, die voormalige werkswinkel van Jules Destape, geopen. In 1887 het Lalique 'n onderneming in Rue du Quatre-Septembre geopen en die volgende jaar die handelsmerk "RL" geregistreer. In 1890 open hy 'n winkel in die Opera-distrik in Parys. Binne 'n dekade was Lalique een van die bekendste Paryse juweliers.

Oiseau de Feu (Vuurvoël), 1922

In 1905 het Lalique 'n nuwe winkel by Place Vendôme geopen wat nie net juweliersware, maar ook glaswerke, uitgestal het. Dit was naby die winkel van die befaamde parfumeur, François Coty; in 1907 het Lalique begin om swierig versierde parfuumbottels vir Coty te produseer. Die vervaardiging van glasvoorwerpe het in 1902 by Lalique se plattelandse villa begin en is tot minstens 1912 daar voortgesit. Die eerste Lalique-glasfabriek is in 1909 in 'n gehuurde fasiliteit in Combs-la-Ville, wat Lalique later in 1913 gekoop het, geopen. In Desember 1912 het Lalique 'n uitstalling van Lalique Glass, soos sy glas bekend sou staan, in die Place Vendôme-winkel gehou. Gedurende die Eerste Wêreldoorlog het die glasfabriek alledaagse items ter ondersteuning van die oorlogspoging, vervaardig. In 1919 is werk aan 'n nuwe produksie-aanleg in Wingen-sur-Moder, wat in 1921 geopen is, begin. Van 1925-1931 vervaardig Lalique 29 modelle masjienkapversierings vir motors; 'n meerminbeeldjie wat aanvanklik in 1920 geproduseer is, is ook later as 'n masjienkapversiering verkoop. Gedurende die 1920's en 1930's was Lalique een van die wêreld se bekendste glasmakers.

René Lalique is in 1945 oorlede. Sy seun Marc Lalique het die onderneming oorgeneem en aanvanklik as 'M.Lalique' en later as 'Cristal Lalique' bedryf. Onder Marc se leiding het die maatskappy oorgegaan van die vervaardiging van die beroemde Lalique Glass na loodglas, algemeen bekend as kristal. Marie-Claude Lalique het ná Marc se dood in 1977 beheer oor die onderneming geneem. Dit is in 1994 aan Pochet verkoop, en in 2008 aan 'n vennootskap van Art & Fragrance en die beheermaatskappy Financière Saint-Germain. Sedert 2010 word Cristal Lalique in geheel deur Art & Fragrance besit.

Werke
Sirene (beeldjie/masjienkapornament), 1920
Ornamentele Lalique-glasvoorwerp in Art Nouveau-styl

Lalique produseer deesdae 'n verskeidenheid luukse produkte in vyf hoofkategorieë: juweliersware, dekoratiewe items, interieurontwerp, parfuum en kuns. Die maatskappy is veral bekend vir die vervaardiging van kunswerke in glas, en gebruik sedert die middel van die twintigste eeu hoofsaaklik kristal (loodglas). Die toevoeging van parfuums (in 1992) en dekoratiewe voorwerpe en kuns van ander materiale as glas (sedert 2011), is onlangse toevoegings tot Lalique se produktekreeks. Reproduksies van René Lalique se ontwerpe het sedert 2009 toegeneem.

Lalique-glasengele, Sint Matthew-kerk, Jersey

Van die stigting van die onderneming, tot die 1900's-1910's was Lalique een van Frankryk se voorste ontwerpers van juweliersware in die Art Nouveau-styl. Tydens die eerste twee dekades van die twintigste eeu het Lalique een van die wêreld se bekendste vervaardigers van artistieke glasvoorwerpe geword. Gedurende die eerste helfte van die twintigste eeu het Lalique parfuumbottels, vase (ongeveer 300 ontwerpe), masjienkapversierings vir motors (30 ontwerpe) en dekoratiewe glaswerke, soos inkpotjies, boekstutte en papiergewigte, vervaardig. Lalique het ook verskeie interieurs, waar hy groot hoeveelhede glas ingesluit het, ontwerp, byvoorbeeld: die SS <i id="mwaQ">Parys</i>, die SS <i id="mwaw">Ile de France</i>, die SS <i id="mwbQ">Normandie</i>, die Orient Express- treinwaens, die Peace Hotel (Shanghai), die Oviatt-gebou (Los Angeles) en St. Matthew-kerk (Jersey).

Fabriek

Die maatskappy se enigste produksiefasiliteit is die Cristallerie Lalique in Wingen-sur-Moder. Dit is in 1921 geopen as die Verrerie d'Alsace (Alsace Glasfabriek) en het die huidige naam in 1962 gekry. [1]

Bronne
  • Lalique, More than a Name. Lalique. Besoek op 16 Junie 2015.
  • Rene Lalique - A Giant Among Giants. Rlalique.com. Geargiveer vanaf oorspronklike op 29 Desember 2014. Besoek op 16 Junie 2015.
  • Lalique Timeline. Lalique. Besoek op 16 Junie 2015.
  • History of Rene Lalique Glass. Crystal Classics. Besoek op 16 Junie 2015.
  • Lalique: A unique and exceptional know-how. YouTube. Lalique Vietnam. 9 October 2014. Besoek op 16 Junie 2015.

Verwysings
  1. "Lalique : A unique and exceptional know-how". YouTube (in Engels). Lalique Vietnam. 9 Oktober 2014. Geargiveer vanaf die oorspronklike op 17 Maart 2016. Besoek op 16 Junie 2015. The LALIQUE factory was built in 1921 by the company's founder René Lalique, in the village of Wingen-sur-Moder in Alsace, a region of France which has the strongest glassmaking traditions. It has remained to this day the world's sole LALIQUE production facility.

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.