Laekosteredery
'n Laekostelugredery, ook bekend as 'n geen fieterjasies ("no-frills"), afslag- of begrotingslugredery, of LCC ("Low-cost carrier") is 'n lugredery wat oor die algemeen laer tariewe aanbied maar met minder geriewe. Om op te maak vir verlore inkomste weens afgemerkte kaartjiepryse, kan die lugredery fooie hef vir ekstras soos kos, prioriteit-instap, sitplektoekenning, bagasie, ens.
Tans is die wêreld se grootste laekosteredery South West Airlines, wat in die Verenigde State van Amerika en 'n paar omliggende gebiede opereer.
Effektiewe kostebesparing
By laekosterederye word die pryse laag gehou deur koste te bespaar, onder andere deur passasiers vir etes aan boord te laat betaal, deur nie deur reisagente te werk nie en deur meer as 90% van die kaartjies via die internet te verkoop. Die afwesigheid van verskillende klasse in die kajuit lewer ook kostevoordele op, omdat daar geen addisionele items soos koerante of verskillende spysenieringsprodukte nodig is nie.
Daarbenewens word die omdraaityd so kort moontlik gehou, deur byvoorbeeld streng op te tree teen reisigers wat laat opdaag, en die kajuit na die vlug deur die kajuitpersoneel te laat opruim. Dit kan lei tot een heen- en weervlug méér as wat 'n tradisionele redery in dieselfde tyd kan maak.
