Kristijonas Donelaitis

Kristijonas Donelaitis (* 1 Januarie 1714, † 18 Februarie 1780; Latyns: Christian Donalitius) was die Evangelies-Lutherse predikant van 'n Duits-Litause kerkgemeente in Pruisies-Litaue, 'n streek in die ooste van die Koninkryk Pruise wat onder meer deur 'n minderheid etniese Litauers bewoon is. As digter het Donelaitis, wat ook Duitse poësie geskryf het, bekendheid verwerf met die eerste klassieke gedig in Litaus, Metai of "Die Seisoene".

Metai, wat steeds as een van die meesterwerke van Litause digkuns beskou word en sedert 1977 deel uitmaak van Unesco se Biblioteek van Europese Literêre Meesterwerke, beskryf die alledaagse lewe van Litause boere, hul moeilike lewe as lyfeienes en die seisoenale jaarlikse lewensiklus.