Krieketvereniging van Nepal

Die Krieketvereniging van Nepal (Engels: Cricket Association of Nepal, afgekort “CAN”; Nepalees: नेपाल क्रिकेट सङ्घ) is die bestuursliggaam wat krieket in Nepal beheer en is in Mulpani, Katmandoe, gesetel. Die beheerliggaam is in 1946 gestig. Sedert 1996 verteenwoordig dit Nepal by die Internasionale Krieketraad (IKR) as ’n assosiaatlid en sedert 1990 ook by die Asiatiese Krieketraad (Asian Cricket Council, ACC).

Krieketvereniging van Nepal
Kenteken van die Krieketvereniging van Nepal
Kenteken van die Krieketvereniging van Nepal
Engelse naam Cricket Association of Nepal
Afkorting CAN
Nepalese naam नेपाल क्रिकेट सङ्घ
Land Vlag van Nepal Nepal
Sportsoort Krieket
Stigting 1946
Lid van Internasionale Krieketraad
Aangesluit in 1988
Vastelandse beheerliggaam Asiatiese Krieketraad
President Chatur Bahadur Chand
Sekretaris Paras Khadka
Setel Mulpani, Katmandoe, Nepal
Amptelike tale Engels en Nepalees
Amptelike webwerf cricketnepal.org.np

Geskiedenis

Die Krieketvereniging van Nepal is in 1946 gestig. In 1988 het dit ’n geaffilieerde lid van die Internasionale Krieketraad (IKR) geword en in 1996 ’n assosiaatlid.[1] Daarbenewens het die CAN in 1990 ’n lid van die Asiatiese krieketkonferensie (Asian Cricket Conference, ACC; nou Asiatiese Krieketraad) geword.[2]

Taak
Setel van die Krieketvereniging van Nepal in Katmandoe

Die Krieketvereniging van Nepal organiseer verskeie nasionale spanne, insluitend Nepal se nasionale seniorkrieketspan vir mans (The Rhinos), vroue en jeug. Hulle is ook verantwoordelik vir die bestuur en organisasie van EDI- en T20I-reekse teen ander spanne, en vir die reëling van internasionale wedstryde tuis. Daarbenewens is die Krieketvereniging van Nepal verantwoordelik vir inkomsteverkryging deur die verkoop van kaartjies, borgskappe en uitsaairegte, veral in verband met die Nepalese span.

Daarbenewens bestuur die beheerliggaam kinder- en jeugkrieket in Nepal. Net soos ander krieketlande beskik Nepal oor ’n o/19-nasionale span wat aan die o/19-krieketwêreldbeker deelneem.[3]

Kenteken

Die Nepalese nasionale krieketspan se byname is The Rhinos, Gorkhalis en The Cardiac Kids. Die Krieketvereniging van Nepal se kenteken toon derhalwe ’n renoster.

Verwysings
  1. (en) "Cricket Association of Nepal". Internasionale Krieketraad. Besoek op 15 Februarie 2024.
  2. (en) "Inaugural Meeting of The Asian Cricket Conference on 19th and 20th September 1983, New Delhi, India". Asiatiese Krieketraad. Besoek op 15 Februarie 2024.
  3. (en) Martin Williamson (11 Januarie 2006). "The Under-19 World Cup". ESPNcricinfo. Besoek op 15 Februarie 2024.

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.