Kraal Uitgewers

Kraal Uitgewers is ’n klein, maar gespesialiseerde uitgewersmaatskappy wat hoofsaaklik op die publisering van gehalte-boeke in Afrikaans oor Afrikanerkultuur en geskiedenis fokus. Kraal Uitgewers publiseer hoofsaaklik niefiksie.[1]

Kraal Uitgewers is in 1999 gestig, kort nadat Suid-Afrika die 100-jarige herdenking van die uitbreek van die Anglo-Boereoorlog gevier het. Dit was, volgens die webblad van die uitgewery, die liefde en passie vir spesifiek die geskiedenis van die Anglo-Boereoorlog van Paul Alberts, een van Suid-Afrika se bekendste joernalistieke fotograwe, en kol. Frik Jacobs, voormalige direkteur van die Oorlogsmuseum in Bloemfontein wat uiteindelik tot die stigting van hierdie unieke uitgewershuis gelei het.[1]

Kraal Uitgewers is sedert 2010 deel van die Solidariteit Beweging. Die inskakeling van Kraal Uitgewers as deel van die Beweging speel ’n belangrike rol, aangesien Kraal as ’n uitgewershuis ’n kragtige instrument is om idees in die gemeenskap uit te bou.[1]

Kraal Uitgewers sit sy funksie as uitgewer van geskiedkundige Africana werke voort binne die Solidariteit Beweging, maar plaas nou ook ’n sterk fokus op aktuele werk wat binne die Afrikanergemeenskap waardevolle bydraes tot prominente debatte maak.[1]

Buiten werke oor geskiedenis, word daar ook al meer op Afrikaanse letterkunde gefokus.

Enkele van die titels wat uitgegee word deur Kraal Uitgewers is Die Eerste Vryheidsoorlog, 1880-1881 deur dr. J.E.H. Grobler, Bondgenote en dwarstrekkers: Die Transvaalse en Vrystaatse regerings in die Anglo-Boereoorlog, 1899-1902 deur Leopold Scholtz (redakteur prof. Fransjohan Pretorius), Verset en opbou. Skrywers en politici as aktiviste vir Afrikaans deur prof. J.C. Steyn en Wes-Transvaal: Militêre brandpunt van die Anglo-Boereoorlog, deur Pieter de Jager (redakteur prof. Andries Raath). Kraal Uitgewers is ook die uitgewers van reekspublikasies, onder andere die Erwe van ons vaad’re en Kraal Histories reekse.

Kraal Uitgewers staan ook onafhanklike skrywers en uitgewers by met die bemarking van hulle publikasies en produkte wat binne die raamwerk van Kraal se fokus val.

Die gehalte van Kraal Uitgewers se werk word erken deur befondsers soos die Hiemstra Trust en Suid-Afrikaanse Akademie vir Wetenskap en Kuns wat dikwels finansieel tot die publikasies bydra.  Dr. J.E.H. Grobler se Die Eerste Vryheidsoorlog, 1880-1881 is aangewys as wenner van die Suid-Afrikaanse Akademie vir Wetenskap en Kuns se Protea Boekhuisprys vir 2019.