Korsten

Korsten is ‘n woonbuurt van Gqeberha.

Die buurt dateer uit 1853 en lê nagenoeg 2 km uit die middestad. Stanfordweg (M10) skei Korsten in die noordooste van die Neave-nywerheidsgebied. Schauderville lê suidwes van Highfieldweg. Die N2-hoofpad vorm die grens tussen Korsten en Gelvandale. Holland Park in die suidooste word deur Cottrellweg, Kempstonweg, C.J. Langenhovenweg en Burtweg (M26) van Korsten geskei. Die Livingstone Hospitaal is in die noordwestelike hoek van die gebied. In die apartheidsjare het die bevolking rasgemeng gebly.

Dit dra die naam van Frederick Korsten (*Zierikzee, Nederland, 17 Augustus 1773 - †Cradock Place, Algoapark, 16 Junie 1839). Korsten was aanvanklik ‘n soldaat en staatsamptenaar, maar word geleidelik ‘n welvarende sakeman en groot grondeienaar. Hy het geboer op die plaas Cradock Place en was ‘n spekulant en skeepseienaar en betrokke by die walvisvangs, visvangs, skaapboerdery en die handel in sout, vleis, wol en huide en velle. Korsten was in sy tyd een van die mees gesiene persone in die oostelike distrikte van die Kaapkolonie. Sy grootskaalse handelsonderneming naby die middedorp van die destydse Port Elizabeth was die begin van Gqeberha as nywerheidstad. Noordeinde van die huidige stad beslaan sy vroeëre woonplek.