Kona-koffie

Kona-koffie is 'n bekende koffievariant van Coffea arabica wat teen die hange van Mount Hualalai en Mauna Loa in die Noordelike en Suidelike Kona-distrik van die eiland Hawaii in die gelyknamige Amerikaanse deelstaat verbou word.

Die sendeling Samuel Ruggles (1795-1871) het die eerste koffieplante na Hawaii gebring

Die weerspatroon van die Kona-distrikte met sonnige oggende, vogtige, reënerige namiddae en milde nagtemperature is uiters geskik vir die verbouing van eersterangse koffie. Kona-koffie het gevolglik 'n reputasie van besonder hoë gehalte opgebou wat van hom een van die duurste en gewildste koffiesoorte op die wêreldmark gemaak het. "Kona" is tans 'n beskermde koffie van oorsprong, en die naam mag slegs vir koffiebone gebruik word wat in die Kona-distrikte geoes is.