Kommunalka

Kommunalka (Russies: коммуналка, 'n verkleinvorm van коммунальная квартира kommunaljana kvartira, "gemeenskapswoning" of "woongemeenskap", afgelei van die Latynse communio, "gemeenskap", en Frans en Duits quartier) is 'n woonvorm wat in Rusland sedert die 19de eeu gebruiklik is en waarby meerdere huurders of gesinne 'n enkele groot woonstel gemeenskaplik bewoon.[1] Hierby beskik elkeen van die partye oor sy/hul eie vertrek, terwyl sanitêre geriewe en kombuise met die ander partye gedeel moet word. Die term "kommunale woonstel" het eers in die Sowjetunie gebruiklik geraak waar kommunalkas, alhoewel hulle uit woningsnood gebore is, deur die owerheid eufemisties as "nuwe kollektiewe visie van die toekoms" voorgestel is.

Kommunalkas het hul oorsprong in die Tsareryk waar behuising in die vinnig groeiende stedelike nedersettings uiters skaars was. Behuisingsnood was ook kenmerkend vir Sowjet-Russiese stede sodat kommunalkas hier voortbestaan het. Dikwels is groot woonstelle van adellike en ander welvarende gesinne met 'n tiental vertrekke, insluitende die kamers van diensbodes, onderverdeel om nuwe aankomelinge van die platteland in groter stede te kan huisves. Die oorspronklike eienaars is gewoonlik onteien, maar kon in een vertrek, wat hulle self kon kies, aanbly. Kommunalkas word steeds aangetref in alle voormalige Sowjetrepublieke, insluitende Rusland (en hier veral in die historiese middestad van Sint Petersburg), alhoewel getalle besig is om te krimp. Van die bekendste Russiese persoonlikhede, wat in 'n kommunalka grootgeword het, is Wladimir Poetin.